Qazaqstan qazirgi ýaqytta úshinshi modernizatsiia jaǵdaiynda tur.
Elimizdegi modernizatsiia men júieli reformalardy júrgizý máseleleri boiynsha taldaý jáne zertteý jumystaryn tanystyrý kezinde bul jaily Zertteýler jáne konsalting (CRC) ortalyǵynyń sarapshysy Ánýar Boranbaev aitty, dep habarlaidy QazAqparat.
«Biz qazirgi tańda úshinshi modernizatsiia jaǵdaiynda turmyz. Nelikten úshinshi modernizatsiia? Táýelsiz Qazaqstannyń tarihyn saraptaityn bolsaq, aýqymdy eki kezeńdi qarastyrýǵa bolady. Alǵashqysy – toqsanynshy jyldar nemese alǵashqy modernizatsiia kezeńi. Ol kezdegi basty maqsat – egemendikti saqtap, Qazaqstandy álemniń kartasynda bekitip alý edi. Qalai degenmen kez kelgen ózgeristiń ózindik qarajat kózi bolýy kerek. Sol kezeńdegi negizgi draiver – jekeshelendirý boldy», - dedi Ánýar Boranbaev.
Sarapshy toqsanynshy jyldardan bastap erkindik ýaqytymen birge eń jyldam qurylymdyq reformalardyń júzege asyrylǵanyn jetkizdi.
«1998 jylǵy aziialyq daǵdarystan keiin eki myńynshy jyldarǵa aiaq bastyq. Kómirsýtekterdiń baǵasy sol ýaqytta qymbattap, memleket aiaǵynan nyq turdy. Memlekette resýrstar paida bolyp, modernizatsiianyń ekinshi kezeńine aiaq bastyq. Ol kezeńde eldiń damýyna basymdyq berdik, onyń negizgi draiveri retinde tabiǵi resýrstardy aitýǵa bolady. Ekonomikanyń sol kezdegi jyldyq ortasha ósimi aitarlyqtai joǵary boldy da, damýy ortasha deńgeidegi memleketterdiń qataryna ońai endik», - dedi Ánýar Boranbaev.
Áitse de spikerdiń aitýynsha, sol kezde tańdalyp alynǵan model óz jemisin tolyǵymen berip, endigi kezekte ary qarai ne bolady degen suraq týyndap otyr.
«Esterińizde bolsa eki myńynshy jyldardyń basynda-aq búgingi suraqtarǵa jaýap izdele bastaǵan edi. Memlekettik qujattardyń kóbi bilim ekonomikasyn qurýǵa talpynǵanymyzdy dáleldei túsedi. Ol maqsatpen júrsek, tabiǵi resýrstardan buryn kreativti bilim men adamdardyń aqyly negizgi qundylyqqa ie bolady. Mundai jaǵdaida adami kapitaly – basty draiverge ainalýy kerek», - dep túidi Ánýar Boranbaev.
