Qazaqstanda etnosaralyq kelisimdi qamtamasyz etýdiń tiimdi saiasi, quqyqtyq jáne institýtsionaldyq-basqarý júiesi qalyptasty.
Bul týraly búgin Qazaqstan halqy Assambleiasynyń qurylǵanyna 25 jyl bolýyna orai ótken konferentsiiada aityldy, dep habarlaidy QazAqparat.
«Bizdiń konferentsiia Qazaqstan halqy Assambleiasynyń 25 jyldyǵy aiasynda ótkizilip otyr. Bul – úlken jáne mańyzdy kezeń. Kópultty Qazaqstan úshin etnosaralyq kelisimdi qamtamasyz etý mańyzdy basymdyqtardyń birine ainaldy. Birinshiden, Qazaqstan Respýblikasynyń Konstitýtsiiasynda etnosaralyq jáne konfessiiaaralyq qatynastar salasyn retteitin keshendi normalar bar. Bizdiń elimiz bastapqyda mádenietterdiń, tilder men dástúrlerdiń ártúrliligin moiyndaityn azamattyq qoǵamdastyq qurý jolyn tańdady. Ekinshiden, memleket dáiekti túrde ulttyq saiasattyń oilastyrylǵan strategiiasyn júzege asyra otyryp, ultaralyq qatynastar salasyndaǵy turaqtylyqtyń kepili retinde áreket etedi. «Qazaqstan halqy Assambleiasy týraly» Zań, Qazaqstan halqy Assambleiasynyń 2025 jylǵa deiingi damý tujyrymdamasy jáne basqa qujattar qabyldandy», - dedi Qazaqstan halqy assambleiasy tóraǵasynyń orynbasary, Assambleia hatshylyǵynyń meńgerýshisi Janseiit Túimebaev.
Onyń aitýynsha, Elbasynyń saiasi erik-jigeriniń arqasynda azamattyq teńdiktiń naqty institýtsionaldyq tetikteri quryldy jáne ol únemi jetildirilip otyrady. Negizgi institýt – 1995 jyly qurylǵan Qazaqstan halqy Assambleiasy. QHA qurylǵan kezinen bastap óziniń qanatynyń astynda mańyzdy qoǵamdyq infraqurylymdy qurdy jáne biriktirdi.
«Etnostardyń mádenietin, tilderin jáne dástúrlerin damytý úshin jaǵdai jasalǵanyn atap ótken jón. Ulttyq teatrlar, etnikalyq buqaralyq aqparat quraldary bar. Qazaqstandyq etnostardyń mádenietin, dástúrleri men tilderin damytýdy qoldaý úshin memlekettik áleýmettik tapsyrys bólinedi. Osylaisha, Qazaqstanda etnosaralyq kelisimdi qamtamasyz etýdiń tiimdi saiasi-quqyqtyq jáne institýtsionaldy-basqarý júiesi qalyptasty», - deidi ol.
.jpeg)