Qazaqstanda iskerlik belsendilik indeksi teris kórsetkishke aýysty jáne jyl boiy syrtqy infliatsiialyq jaǵdai da qolaisyz bolady. Bul týraly QR Ulttyq bankiniń tóraǵasy Ǵalymjan Pirmatov aitty, dep habarlaidy QazAqparat.
«Qazaqstanda iskerlik belsendilik indeksi naýryzda teris kórsetkishke aýysyp, 48,3 boldy. Resei Federatsiiasyna qarsy sanktsiialarǵa bailanysty logistikalyq problemalar sebebinen shikizat pen materialdardyń baǵasy ósti. Ýkraina men Resei Federatsiiasy arasyndaǵy qaqtyǵys pen eksport kóleminiń qysqarýynan naýryzda ósimdik maiy jáne dándi daqyldar baǵasynyń rekordtyq ósýi FAO azyq-túlik baǵalary indeksiniń 1990 jyldan bergi eń joǵary deńgeiine alyp keldi», - dedi Ǵ. Pirmatov Úkimet otyrysynda.
Spikerdiń aitýynsha, shikizat, janar-jaǵar mai jáne gazdyń qymbattaýynan Eýroaimaqtaǵy infliatsiia naýryzda aldyn ala derekter boiynsha 7,9%-ǵa deiin ósti, AQSh-ta – aqpanda 40 jyldaǵy eń joǵary kórsetkishke jetip, 7,9% boldy. Reseide infliatsiia naýryzda 16,7%-ǵa deiin jedeldedi.
«Qazaqstan úshin biyl syrtqy infliatsiialyq jaǵdai qolaisyz bolady, bul taýar jetkizilimi problemalarynyń saqtalýyna, azyq-túlik pen shikizat baǵasynyń ósýine, teńge baǵamynyń álsireýine jáne geosaiasi táýekelderge bailanysty. Proinfliatsiialyq táýekelderdiń kúsheiýin eskere otyryp, damyǵan elder, atap aitqanda AQSh aqsha-kredit saiasatyn jedel kúsheitýge kóship jatyr», - dep atap ótti Ulttyq bank basshysy.
