قازاقستاندا ٸسكەرلٸك بەلسەندٸلٸك يندەكسٸ تەرٸس كٶرسەتكٸشكە اۋىستى جەنە جىل بويى سىرتقى ينفلياتسييالىق جاعداي دا قولايسىز بولادى. بۇل تۋرالى قر ۇلتتىق بانكٸنٸڭ تٶراعاسى عالىمجان پٸرماتوۆ ايتتى, دەپ حابارلايدى قازاقپارات.
«قازاقستاندا ٸسكەرلٸك بەلسەندٸلٸك يندەكسٸ ناۋرىزدا تەرٸس كٶرسەتكٸشكە اۋىسىپ, 48,3 بولدى. رەسەي فەدەراتسيياسىنا قارسى سانكتسييالارعا بايلانىستى لوگيستيكالىق پروبلەمالار سەبەبٸنەن شيكٸزات پەن ماتەريالداردىڭ باعاسى ٶستٸ. ۋكراينا مەن رەسەي فەدەراتسيياسى اراسىنداعى قاقتىعىس پەن ەكسپورت كٶلەمٸنٸڭ قىسقارۋىنان ناۋرىزدا ٶسٸمدٸك مايى جەنە دەندٸ داقىلدار باعاسىنىڭ رەكوردتىق ٶسۋٸ فاو ازىق-تٷلٸك باعالارى يندەكسٸنٸڭ 1990 جىلدان بەرگٸ ەڭ جوعارى دەڭگەيٸنە الىپ كەلدٸ», - دەدٸ ع. پٸرماتوۆ ٷكٸمەت وتىرىسىندا.
سپيكەردٸڭ ايتۋىنشا, شيكٸزات, جانار-جاعار ماي جەنە گازدىڭ قىمباتتاۋىنان ەۋروايماقتاعى ينفلياتسييا ناۋرىزدا الدىن الا دەرەكتەر بويىنشا 7,9%-عا دەيٸن ٶستٸ, اقش-تا – اقپاندا 40 جىلداعى ەڭ جوعارى كٶرسەتكٸشكە جەتٸپ, 7,9% بولدى. رەسەيدە ينفلياتسييا ناۋرىزدا 16,7%-عا دەيٸن جەدەلدەدٸ.
«قازاقستان ٷشٸن بيىل سىرتقى ينفلياتسييالىق جاعداي قولايسىز بولادى, بۇل تاۋار جەتكٸزٸلٸمٸ پروبلەمالارىنىڭ ساقتالۋىنا, ازىق-تٷلٸك پەن شيكٸزات باعاسىنىڭ ٶسۋٸنە, تەڭگە باعامىنىڭ ەلسٸرەۋٸنە جەنە گەوساياسي تەۋەكەلدەرگە بايلانىستى. پروينفلياتسييالىق تەۋەكەلدەردٸڭ كٷشەيۋٸن ەسكەرە وتىرىپ, دامىعان ەلدەر, اتاپ ايتقاندا اقش اقشا-كرەديت ساياساتىن جەدەل كٷشەيتۋگە كٶشٸپ جاتىر», - دەپ اتاپ ٶتتٸ ۇلتتىق بانك باسشىسى.
