Qazaqstan Ulttyq qaýipsizdik strategiiasyn qaita qaraǵan alǵashqy elderdiń qatarynda. Bul pikirdi QR Prezidenti janyndaǵy Qazaqstan strategiialyq zertteýler institýty direktorynyń orynbasary Sanat Kóshkimbaev bildirdi, dep habarlaidy QazAqparat.
«Búgin qabyldanǵan qujat – Qazaqstan Respýblikasynyń 2021-2025 jyldarǵa arnalǵan Ulttyq qaýipsizdik strategiiasy – Tuńǵysh Prezident Nursultan Nazarbaevtyń tóraǵalyǵymen ótken Qaýipsizdik Keńesiniń otyrysynda bekitildi. Árine, Strategiia qazir álemde bolyp jatqan ózgeristerdi kórsetedi. Bul biologiialyq qaýipsizdikke bailanysty jáne qazirgi koronavirýs pandemiiasymen kúresý ǵana emes, ekonomikalyq, tehnologiialyq qaýipsizdik máseleleri de bar. Biz pandemiianyń ekonomikalyq jaǵdaiǵa, halyqaralyq saýdaǵa qalai áser etkenin kórip otyrmyz. Munyń bári – óte mańyzdy aspektiler. Qazaqstan ekonomikasy úshin osyndai syn-qaterler men qaýipterdi toqtatýǵa daiyn bolýymyz kerek. Qazir de barlyq elder ózderiniń qaýipsizdik strategiialaryn qaita qarastyryp jatyr jáne Qazaqstan álemde bolyp jatqan jaǵdailarǵa ún qata otyryp, alǵashqylardyń qatarynda boldy», - deidi S. Kóshkimbaev.
Sarapshy Strategiiada aldaǵy 5 jylǵa ekonomika men halyqaralyq qatynastardaǵy ózgerister boiynsha boljam beriletinin atap ótti. Bul qujat memlekettik basqarýdyń barlyq júiesin jáne búkil qoǵamdy túrli daǵdarystyq qubylystardyń aldyn alýǵa jáne toqtatýǵa baǵyttaidy. Strategiia «jeke tulǵanyń qaýipsizdigi - qoǵamnyń qaýipsizdigi - memlekettiń qaýipsizdigi» úshtaǵanyn qamtidy jáne ol memlekettik organdardyń saraptamalyq pikirleri men usynystaryn eskere otyryp, muqiiat pysyqtalǵan qujat. Tutastai alǵanda, Strategiia «halyq únine qulaq asatyn memleket» qaǵidattarymen, Prezident Qasym-Jomart Toqaev júrgizip otyrǵan saiasatpen sáikes keledi jáne ekonomikanyń turaqtylyǵyn arttyrýǵa, onyń shikizattyq baǵdarynan alshaqtaýǵa, básekege qabiletin arttyrýǵa, aqparattyq-kommýnikatsiialyq salany damytýǵa baǵyttalǵan.
Sonymen birge S.Kóshkimbaev azyq-túlik qaýipsizdigi ekonomikalyq qaýipsizdiktiń negizi ekenin ján aýyl sharýashylyǵy sektoryn damytýǵa jáne turaqtylyǵyn arttyrýǵa basa nazar aýdarylýy tiis ekenin atap ótti.
«Qazaqstan úshin sý qaýipsizdigi máselesi de óte ózekti jáne ol halyqaralyq qatynastarmen tyǵyz bailanysty, óitkeni eldegi sýdyń kóp bóligi kórshi elder aýmaǵynda qalyptasady. Sondyqtan kórshilermen, eń aldymen Reseimen jáne Qytaimen qarym-qatynas ornatý óte mańyzdy. Jalpy alǵanda jaqyn arada halyqaralyq qatynastar júiesi týrbýlenttikke ushyraidy dep kútilýde, bul kóbinese halyqaralyq arenadaǵy jahandyq oiynshylardyń qaishylyqtaryna bailanysty. Mundai jaǵdailarda Qazaqstanǵa syrtqy saiasatta ýaqyt synynan ótken kópvektorlyqqa negizdelgen jáne ulttyq múddelerdi qorǵaý men ilgeriletýge tiimdi naqty baǵdarlar bolýy qajet», - deidi Sanat Kóshkimbaev.
Aita keteiik, Memleket basshysy Qasym-Jomart Toqaev «Qazaqstan Respýblikasynyń 2021-2025 jyldarǵa arnalǵan Ulttyq qaýipsizdik strategiiasyn bekitý týraly» Jarlyqqa qol qoidy.
