Foto: QR SIM
Syrtqy ister ministrliginiń resmi ókili Aibek Smadiiarov Qazaqstan men Armeniia UQShU-dan bir mezgilde shyǵý máselesin talqylap jatqany týraly aqparatty joqqa shyǵardy, dep habarlaidy "Ult aqparat".
"Iá, bir agenttikten oqyp qaldym. Endi áriptesterden anyqtaýǵa tyrysamyn. "Qazaqstan Ujymdyq qaýipsizdik týraly shart uiymynan shyqqaly jatyr" degen aqparat tarap jatyr. Bul shyndyqqa janaspaidy.
Eger Armeniia óz talaptaryn belgilese, sol eldiń isi ǵoi. Ol týraly eshteńe aita almaimyn. Al biz bul uiymnyń sheńberinde áli jumys istep jatyrmyz.
Osydan birneshe kún buryn UQShU-ǵa múshe elderdiń Syrtqy ister ministrleri óz keńesterin ótkizdi. Onda uiymnyń odan ári damý joldary, uiym aiasyndaǵy ózara is-qimyl talqylandy. Sondyqtan biz osy baǵytta jumys istep jatyrmyz", - dedi ol jýrnalisterdiń suraǵyna jaýap berip.
Aita keteiik, Qazaqstan UQShU-dan shyǵýǵa nietti degen feikter alǵash ret tarap jatqan joq. Mysaly 2022 jylǵy 15 qyrkúiekte de QR Syrtqy ister ministrligi osyndai aqparatty joqqa shyǵarýǵa májbúr boldy.
Eske salaiyq, Ujymdyq qaýipsizdik týraly shart uiymyna múshe alty memleket bar: Resei, Qazaqstan, Qyrǵyzstan, Armeniia, Belarýs, Tájikstan.
