Foto: Akorda.kz
QR Úkimeti men ArcelorMittal korporatsiiasy «ArselorMittal Temirtaý» AQ-ny Qazaqstanǵa berý týraly mámilege keldi. Atalǵan kelisimniń egjei-tegjeiin baspasóz máslihatynda ónerkásip jáne qurylys ministri Qanat Sharlapaev aitty, dep habarlaidy "Ult aqparat" primeminister.kz saityna silteme jasap.
Ministr biyl tamyz aiynda Prezident Qasym-Jomart Toqaev «ArselorMittal Temirtaý» AQ-da oryn alǵan apat kezinde kompaniianyń investitsiialyq jáne ózge de mindettemelerin óreskel buzǵany týraly aitqanyn eske saldy. Sol kezde Memleket basshysy AMT-men investitsiialyq yntymaqtastyqty toqtatý jóninde tapsyrma bergenin atap ótti.
Bul ýaqytta Qazaqstan Úkimeti «ArselorMittal Temirtaý» ielerimen ArcelorMittal kompaniiasyn metallýrgiialyq kombinat quramynan shyǵarý múmkindigi týraly kelissózder júrgizilip jatqan. Kelissózder 2022 jyldyń 3 qarashasynda AMT-nyń enshiles kásiporny – Lenin atyndaǵy shahtada bolǵan qaiǵyly apattan keiin bastaldy.
Úkimet «ArselorMittal Temirtaý» kompaniiasyna naqty talaptar qoidy.
Kelissózder nátijesinde 2022 jylǵy 9 jeltoqsanda Qazaqstan Úkimeti men ArcelorMittal arasynda qazaqstandyq tarapqa kásiporyndy baǵalaý jáne aýdit júrgizýge múmkindik beretin «Standstill Agreement» kelisimine qol qoiyldy.
Ministr kelissózder barysynda ArcelorMittal $3,5 mlrd suraǵanyn, bul halyqaralyq konsýltanttardyń esebine sáikes kelmeitinin atap ótti.
«Bul kelissózder úderisiniń uzaqqa sozylýynyń basty sebepteriniń biri boldy. Bizdiń maqsatymyz – qymbat jáne uzaqqa sozylatyn halyqaralyq sot protsesterine jol bermei, kombinatty ádil baǵamen satyp alý boldy. Kásiporynnyń toqtap qalmaýy úshin kelissózderdi jedel ári jyldam júrgizýdiń qajettiligi týyndady», — dedi Qanat Sharlapaev.
Onyń aitýynsha, kelissózder protsesi 11 raýndtan turdy, nátijesinde eki tarap ta ortaq ustanymǵa qol jetkizdi.
«Qazaqstan Úkimeti men “ArselorMittal” arasyndaǵy kelisimdi mega-mámile dep ataýǵa bolady, onyń elimiz úshin mańyzy erekshe. Biz basqa elderdiń úkimetteri tap bolatyn kóptegen táýekelderdi ainalyp óte aldyq», — dep atap ótti ministr.
Ol sondai-aq jasalǵan mámileniń úsh negizgi elementin jariialady:
1. Memleket aktivter qunyn $3,5 mlrd-tan $286 mln-ǵa deiin tómendetti;
2. Mámileni júzege asyrýǵa memlekettik biýdjetten bir de bir teńge jumsalǵan joq;
3. Jańa investor ArcelorMittal bas kompaniiasy aldaǵy 4 jyl ishinde $250 mln somasyndaǵy qysqa merzimdi nesieni jáne $450 mln uzaq merzimdi nesieni óteý boiynsha mindetteme alady.
«$286 mln – bul tolyq jumys istep turǵan eki kásiporynnyń quny ekenin erekshe atap ótkim keledi. Sonymen qatar ArcelorMittal Qazaqstan Úkimetine eshqandai talap qoimaidy. Kelisim halyqaralyq quqyq normalaryn tolyq saqtai otyryp, quqyqtyq negizde jasaldy», — dedi Qanat Sharlapaev.
Onyń ústine QR Ónerkásip jáne qurylys ministrligi men QR Ádilet ministrligi ókilderinen quralǵan qazaqstandyq kelissózder toby ArcelorMittal kompaniiasyn «Qazaqstan halqyna» qaiyrymdylyq qoryn qoldaý úshin 16 mlrd teńge kóleminde jarna jasaýǵa kóndirdi.
AMT-dan qorǵa túsetin qarajat Qaraǵandy oblysy turǵyndarynyń ózekti máselelerin sheshýge jáne áleýmettik mańyzy bar jobalardy júzege asyrýǵa baǵyttalady. Sondai-aq bul somanyń 50%-y Temirtaý qalasyna jumsalady.
