Qyrǵyzstannyń Osh qalasynda politsiia qaýipti retsidivist qylmysker Jyldyzbek Bekmurzaevty izdep jatyr. Ol Qostanaidaǵy qonys koloniiasynan qashyp ketken.
Bekmurzaev qaraqshylyq, zorlaý jáne tonaý qylmysy úshin buǵan deiin birneshe ret sottalǵan, dep habarlaidy Sputnik Qyrǵyzstan.
Qazaqstanda Bekmurzaevty ne úshin sottady?
Bekmurzaev 2017 jyly shekarany zańsyz kesip ótkeni úshin Qazaqstanda ustalady. Qyrǵyzstannyń ishki ister ministrligi qylmyskerdi ekstraditsiialaýdy suraidy, biraq qazaqstandyq sot ony jarty jylǵa qonys koloniiasyna jiberedi.
Qyrǵyzdyń quqyq qorǵaý organdarynyń málimdeýinshe, Bekmurzaev Qazaqstandaǵy koloniiadan qashyp ketip, eline oralyp, jańa uiymdasqan qylmystyq top qurǵan.
Qazaqstannyń IIM qylmystyq-atqarý júiesi komiteti qylmysker koloniiadan qashyp ketti degen aqparatqa túsinikteme berdi. Komitet ókilderi Bekmurzaevtyń Qazaqstanda sottalǵanyn rastady, biraq bir máseleni naqtylap ótti.
"Ol qashyp ketken joq. Bul jazany óteýden jaltarý bolyp tabylady, iaǵni ol qonys koloniiasynan ketip qaldy. Zań boiynsha bul "jaltarý" dep atalady, qashý emes. Jabyq túrmeden qashady, al bul jaǵdaida ol jazasyn óteýden jaltardy", — dedi Qazaqstan IIM komitet baspasóz qyzmetiniń jetekshisi Ǵalymjan Hasenov.
Bekmurzaevtyń jańa bandasy
Qyrǵyzstannyń tergeý organdarynyń aitýynsha, Bekmurzaevtyń jańa bandasy biyl mamyr-shilde ailarynyń aralyǵynda adam óltirip, tonap, birneshe qylmys jasaǵan. Tamyzda Bekmurzaevtyń sybailastarynyń biri ustaldy.
Keshe Osh qalasynyń shetinde patrýl jasap júrgen politsiia qyzmetkerleri Bekmurzaevqa uqsaityn er adamdy baiqaidy. Tártip saqshylary odan qujattaryn kórsetýdi suraidy, biraq beitanys adam sómkesinen qarýǵa uqsaityn zat alyp shyǵyp, politseiler jaqyndasa atamyn dep qorqytady. Osydan keiin kúdikti kólikke minip qashady jáne sońynan qýǵan politseilerdiń kóligin qiratady. Degenmen, qylmysker alysqa qashyp kete almaidy, onyń "Mersedesi" shalshyqqa batyp qalǵan. Sonda da ol berilmei, kóligin tastap, júgeri alqabynyń arasyna kirip joq bolady.
Politseiler alqapty qorshap tastady, qaladan shyǵatyn joldar qatań baqylaýǵa alyndy.
