Qazaqstan túrmelerinde ekstremizm, terrorizm úshin sottalǵan 400-den astam adam bar. Bul týraly búgin Májilistegi Úkimet saǵatynda QR Ishki ister ministri Qalmuhanbet Qasymov málim etti, dep habarlaidy QazAqparat.
«Iá, qazirgi ýaqytta bizde ekstremizm, terrorizm úshin sottalǵandar bar. Kolloniialarda shamamen 400 adam ustalyp otyr. Árine, olarǵa biz qamaýda ustaýdyń airyqsha rejimin qoldanamyz. Biraq, olardy durys jolǵa qoiý úshin qylmystyq atqarý júiesiniń shtatyna teolog mamandyǵyn engizdik. Jekelegen birlikterdi qysqarttyq jáne bizdiń barlyq kolloniialarymyzda mundai mamandar bar», - dedi ministr depýtattardyń saýalyna orai.
Sonymen qatar ol qazirgi ýaqytta teolog mamandar elimizdiń Din isteri jáne azamattyq qoǵam ministrligimen birlesip jumys jasap jatqanyn basa aitty.
«Jaqsy tájiribe jolǵa qoiyldy. Nátijeleri de jaman emes. Menińshe, biz ony odan ary qarai damytamyz. Árine, bizder úshin bul jańa qyzmet. Soǵan qaramastan odan ary damyta beremiz», - dedi Qalmuhanbet Qasymov.
Aita keteiik, Májilistegi Úkimet saǵatynda «Bas bostandyǵynan aiyrý oryndarynan bosatylǵan jáne probatsiia qyzmetinde esepte turǵan azamattardy áleýmettik ońaltýdyń 2017-2019 jyldarǵa arnalǵan keshendi strategiiasyn iske asyrý» máseleleri talqylanýda.
