Túrki eliniń atajurty, qasietti qarashańyraq, kieli Túrkistan qalasynda Túrkitildes elder Parlamenttik Assambleiasy Keńesiniń otyrysy ótti. Onda Qazaqstan TúrkPA-ǵa tóraǵalyq etýdi Ázerbaijan elinen qabyldap aldy, dep habarlaidy QR Parlamenti Májilisiniń baspasóz qyzmeti.
Májilis Spikeri Nurlan Nyǵmatýlin halyqaralyq uiymǵa tóraǵalyq etýdi erekshe qurmetpen qabyldap alyp, bul bizdiń el úshin úlken mártebe jáne zor jaýapkershilik ekenin alǵa tartty. Osy oraida Palata Spikeri baýyrlas ázirbaijan halqyna shyn júrekten alǵysyn bildirdi.
- Túrki Keńesiniń otyrysynda Qazaqstannyń Tuńǵysh Prezidenti, Elbasy, TúrkPA-nyń negizin qalaýshy, túrki Keńesiniń Qurmetti Tóraǵasy Nursultan Nazarbaev osy Keńesti tolyqtai halyqaralyq uiymǵa ózgertý týraly bastama kótergen bolatyn, - dedi Májilis Tóraǵasy.
Palata Spikeriniń aitýynsha aldymyzda qarasha aiynda Ystambýlda ótetin Túrki Keńesiniń kezekti otyrysynda Memleket basshylary tiisti sheshim qabyldaidy dep kútilýde. Sonymen qatar, eger sondai sheshim qabyldansa, Assambleianyń ataýyn Túrki memleketteriniń Parlamenttik Assambleiasy dep ózgertýdi usynatynyna toqtaldy.
- Aldaǵy bir jyl ishinde biz qalyptasqan muragerlikti saqtai otyryp, elderimizdiń arasyndaǵy bailanysty odan ári tereńdetý, parlamentaralyq yntymaqtastyqty nyǵaitý, Assambleia aiasyn keńeitý jáne halyqaralyq bedelin arttyrý jolynda birlese eńbek etetin bolamyz, - dedi Nurlan Nyǵmatýlin.
Aita ketý kerek, uiym qurylǵan kúnnen bastap, ózara is-qimyldy kúsheitýge, memleketaralyq bailanysty nyǵaitýǵa, elderimizdiń halyqaralyq bedelin arttyrýǵa, aimaqtyq qaýipsizdikti qamtamasyz etýge úlken úles qosyp keledi.
