Foto: Tengrinews.kz/Turar Qazanǵapov
Qazaqstan tólqujaty - Ortalyq Aziia elderi arasyndaǵy eń myqtysy. Mundai tólqujat iesi álemniń 39 eline vizasyz kire alady, taǵy 52 elge bara salysymen viza ala alady. Al 107 elde qazaqstandyqtardan viza talap etiledi, - dep habarlaidy Tengritravel.kz saity FinProm basylymyna silteme jasap.
2023 jyldyń 1 shildesindegi reiting boiynsha Qazaqstan 97 el arasynda 53-orynǵa jaiǵasypty. Reitingke BUU-ǵa múshe 193 memleket pen 6 aýmaq qatysqan (birneshe el bir oryn alýy múmkin).
Al álem boiynsha eń myqty tólqujat - BAÁ azamattarynda. Olar álemniń 125 eline vizasyz kire alady, taǵy 55 elde vizany memleket aýmaǵyna kelgennen keiin beredi, al olardan vizany talap etetin 18 el ǵana bar.
TMD elderi arasynda Qazaqstan tólqujaty Ýkraina, Resei, Moldova men Belarýske jol berip tur, alaida Armeniia, Ázirbaijan, Qyrǵyzstan, Ózbekstan, Tájikstan men Túrkmenstannan joǵary.
Árbir tólqujattyń jeke sanatyn anyqtaý úshin sarapshylar úsh deńgeili ádis qoldandy:
• Mobildilikti baǵalaý (MS) - vizasyz rejim (VF), vizany elge kelisimen alý (VOA), elge kirýge elektrondy ruqsat (eTA) jáne elektrondy viza (eVisa) kiredi, eger úsh kúnde berilse.
• VF pen VOA-ny salystyra baǵalaý.
• BUU damý baǵdarlamasy boiynsha adam áleýetin damytý indeksi (qosymsha kórsetkish retinde).
