Senator Baýyrjan Qaniev elimizdiń temirjol salasyn reformalaý qajet dep sanaidy.
Depýtat Premer-Ministr Álihan Smailovtyń atyna joldaǵan depýtattyq saýalynda elimizdegi temirjoldyń problemalary týraly aityp, olardy sheshý joldaryn usyndy, dep habarlaidy QazAqparat.
Senatordyń aitýynsha, búgingi tańda «Jolaýshylar tasymaly» AQ jyljymaly quram parkinde 2 228 vagon bar, olardyń 35 paiyzynyń paidalanýǵa berilgenine 28 jyldan asyp ketken. Talgo vagondaryn eseptemegende, jolaýshylar vagondary ortasha eseppen 63%-ǵa, al lokomotivter 67%-ǵa tozǵan.
B. Qaniev óziniń depýtattyq saýalynda ishki júk tasymalynyń qymbattyǵy máselesin de kóterdi. Ol taýarlardyń túpki qunyn arttyrýǵa yqpal etedi. Atap aitqanda, «QTJ» AQ menshiginde júkti tieý-túsirýge arnalǵan 170 arnaiy oryn bar, al olardyń jeke menshiktegi sany 3 600-den asady.
Senatordyń pikirinshe, ol jerdegi tarifterdiń baqylaýsyzdyǵy men alypsatarlyq áreketter temirjol júkteri baǵasynyń aitarlyqtai qymbattaýyna ákelip otyr.
«Temirjol tasymalynyń áleýmettik-ekonomikalyq mańyzy men tranzittik áleýetin eskere kelgende, «Qazaqstan temir joly» AQ túbegeili reformalardy qajet etedi. Osy máselelerdi sheshýdi, eń aldymen, salanyń tájiribeli mamandaryn basshylyq laýazymdarǵa taǵaiyndaýdan bastaǵan jón dep sanaimyz. Elimizde memlekettik aktivterdi jekeshelendirý saldarynan bolǵan jaǵymsyz jaǵdailardy eskere otyryp, jekeshelendirilgen júk tieý oryndaryn, bagaj bólimshelerin «Qazaqstan temir joly» AQ menshigine qaitarý qajet», - dedi depýtat.
