«Qazaqstan temir joly» ulttyq kompaniiasy qaryz júktemesine bailanysty IRO-ǵa 2023 jyly shyǵarylýy múmkin.
Bul týraly búgin QR Premer-Ministriniń birinshi orynbasary - Qarjy ministri Álihan Smaiylov aitty, dep habarlaidy QazAqparat.
«Qazaqstan temir jolynda problemalar bar. Sondyqtan biz qazirgi ýaqytta merzimin sál keiinge, 2023 jylǵa deiin shegerý bastamasyn jasaǵymyz keledi. Qalǵan kompaniialar menińshe, merziminde, 2020 jyly IRO-ǵa shyǵatyn bolady», - dedi ol Senattyń jalpy otyrysynda.
Osy rette ministr kompaniianyń IRO-ǵa der ýaqytynda qandai problemalar kedergi bolyp otyrǵandyǵyn aitty.
«Bul problemalar belgili. Sóz atalǵan kompaniianyń qarjy júktemesi jaiynda bolyp otyr. Qazirgi ýaqytta qarjylyq jaǵdaiyn jaqsartý, naqty aitqanda QTJ-nyń qaryzyn qaita qurylymdaý boiynsha jumys júrgizilip jatyr. Jalpy, arnaýly jol kartasy ázirlendi jáne biz bul máselede ilgerilep kelemiz. Menińshe, taiaý birneshe jyldyń ishinde bul másele qajetti shekte bolady», - dedi Álihan Smaiylov jalpy otyrystan keiin BAQ ókilderiniń saýalyna orai.
Onyń atap ótýinshe, kompaniia kezinde alǵan valiýtalyq qaryz eldiń ishki qaryzymen almastyrylady.
«Iaǵni, olar baǵamdyq táýekelderge bailanysty qyzmet kórsetýge qymbatqa túsetin valiýtalyq qaryzdan qutylý úshin el ishinde teńgemen aqsha tartady. Bizdiń halyqaralyq konsýltanttar naryq koniýtýrasyn eskere otyryp, bul máselede asǵystyq jasaýǵa bolmaidy dep sanaidy», - dedi ol.
