IIM Kóshi-qon qyzmeti Qazaqstan tarapynan qabyldaýshy tulǵalar sheteldiktiń kelgeni týraly habarlaýǵa mindetti ekenin eske saldy, - dep habarlaidy "Ult aqparat" Polisia.kz portalyna silteme jasap.
"Qurmetti qazaqstandyqtar! Qonaqúilerdiń, hostelderdiń, pansionattardyń, jataqhanalardyń ieleri! Páterler men basqa da turǵyn úi-jailardyń ieleri, Sizderge sóz arnaimyn!
Qazaqstan Respýblikasynyń Ishki ister ministirligi kóshi-qon zańnamasynyń talaptaryn qatań saqtaýǵa shaqyrady.
"Kóship kelýshilerdiń Qazaqstan Respýblikasyna kelýi men onda bolýy qaǵidalarynyń" 9-tarmaǵyna sáikes sheteldik azamattardy qabyldaityn jeke jáne zańdy tulǵalar ózderine keletin kóship kelýshiler týraly Ishki ister organdaryn habardar etýge mindetti ekenin túsindiremiz", - dedi IIM Kóshi-qon qyzmeti komiteti tóraǵasynyń mindetin atqarýshy Aslan Atalyqov.
Onyń aitýynsha, habarlama sheteldik azamat kelgen kúnnen bastap úsh jumys kúni ishinde mindetti túrde beriledi.
"Osy merzimdi ótkizip alǵan jáne kóship kelýshiniń kelýi týraly Ishki ister organdaryna habarlamaǵan jaǵdaida, Qazaqstanda qabyldaýshy jeke jáne zańdy tulǵa Qazaqstan Respýblikasy Ákimshilik quqyq buzýshylyq týraly Kodeksiniń 518-baby boiynsha jaýaptylyqqa tartylatynyn eskertemiz.
Zańdy tulǵalar úshin 10-nan 25 ailyq eseptik kórsetkishke deiin, al qaitalanǵan jaǵdaida 100 ailyq eseptik kórsetkishke deiin aiyppul qarastyrylǵan, bul 306 myń teńgege teń. Jeke tulǵalar úshin eskertý túrindegi jaza, al qaitalap buzǵany úshin 30 ailyq eseptik kórsetkish nemese 91 890 teńge mólsherinde aiyppul kózdelgen", - dedi ol.
Sheteldiktiń kelýi týraly habarlamany qabyldaýshy tarap úsh tásilmen bere alady:
- Birinshi. Jeke jáne zańdy tulǵalar kóship kelýshiniń kelgeni týraly elektrondyq vizalyq jáne kóshi-qon portaly arqyly tikelei habarlai alady: vmp.gov.kz nemese egov.kz. Ol úshin qazaqstandyq tarapqa kóship kelýshiniń elektrondyq tsifrlyq qoltańbasy jáne pasporttyq derekteri jetkilikti.
- Ekinshi ádis. Qazaqstan tarapynan qabyldaýshy jeke jáne zańdy tulǵalar sheteldiktiń kelgeni týraly habarlamany tikelei óz aýdany boiynsha ishki ister organdarynyń kóshi-qon qyzmetiniń bólimderi men bólimshelerine bere alady.
- Úshinshi ońai ádis – Apr Store nemese Play Market-ten e-Qonaq qosymshasyn júkteý. Habarlama eki qadammen beriledi. Tipti, smartfonnyń kamerasynyń kómegimen tólqujatyn skanerleý arqyly sheteldiktiń tólqujat derekterin júkteý múmkindigi bar. Habarlamany avtorizatsiialaý jáne toltyrý intýitivti. Bir minýt ýaqyt alady.
"Jeke jáne zańdy tulǵalar Zańnyń osy talaptaryn saqtaýǵa mindetti ekenine taǵy da nazar aýdaramyz. Sheteldik qonaqtar ózderiniń pasporttyq derekterin qabyldaýshy tarapqa habarlaýy jáne Qazaqstan Respýblikasynyń zańnamasyn saqtaýy tiis", – dedi IIM Kóshi-qon qyzmeti komiteti tóraǵasynyń m.a. Aslan Atalyqov.
