video kadry
Qazaqstan Azyq-túlik qaýipsizdigi jónindegi Islam Uiymynyń (IOS) qoldaýymen jer silkinisinen zardap shekken Siriiaǵa 50 tonna gýmanitarlyq kómegin jetkizdi, - dep habarlaidy "Ult aqparat".
Qazaqstan negizinen memlekettik rezervten bólingen azyq-túlik, jyly kiimder, shatyrlar, kereýetter men tósek-oryn jabdyqtaryn jiberdi. Kómek Aleppo qalasyna QR Ulttyq ulanynyń tórt reisimen jetkizilip jatyr.
IOFS bas direktory Erlan Baidáýlet QR Prezidenti Qasym-Jomart Toqaevtyń tapsyrmasy boiynsha júkterdiń jetkizilýin baqylaý úshin Siriiaǵa jekelei ózi ushqan.
Aleppo áýejaiynda Siriia tarapyna tiisti kómekti tapsyrý rásimine Aleppo gýbernatorynyń orynbasary Abdel Kader Daýalibi, Aleppo áýejaiynyń direktory Muhammed ál-Masri, Siriianyń Qyzyl Jarty aiy uiymynyń ókilderi Samir Shýbýki, Ahmad Samýn, Anas Samaa, sondai-aq Qazaqstannyń Livandaǵy elshisi Rasýl Jumaly qatysqan.
Aleppo gýbernatorynyń orynbasary Abdel Kader Daýalibi qabyldaýshy taraptyń atynan sóz sóilep, Qazaqstan halqyna zor alǵysyn bildirgen. Onyń aitýynsha, aýyrtpalyqty bólisip, qiyn sátte kómek qolyn sozǵan qazaq halqynyń kómegi eshqashan umyt bolmaidy.
"Siriiadaǵy, Túrkiiadaǵy jáne basqa elderdegi jer silkinisiniń barlyq qurbandarynyń otbasylaryna kóńil aitamyn. Bizdiń komanda jaǵdai tez arada sheshiledi dep úmittenedi jáne qutqarýshylarǵa qajyrly eńbekteri úshin alǵys bildiredi", - dedi IOFS bas direktory Erlan Baidáýlet.
Aita keteiik, gýmanitarlyq kómek Siriiaǵa 10 aqpanda jiberildi. Sonymen qatar Qazaqstan Siriiaǵa 160 mln teńgeden astam qarjylai kómek bóledi. Bul týraly QR SIM resmi ókili Aibek Smadiiarov málim etti.
