Niý-Iorkte Qazaqstan Respýblikasy men Tanzaniia Birikken Respýblikasynyń BUU janyndaǵy turaqty ókilderi Qairat Omarov pen Modast Djonatan Mero eki el arasyndaǵy diplomatiialyq qatynastardy ornatý týraly birlesken kommiýnikege qol qoidy, dep habarlaidy QR SIM baspasóz qyzmeti.
Qol qoiý rásimi barysynda Qazaqstan men Tanzaniianyń turaqty ókilderi ekonomikanyń ártúrli salalarynda yntymaqtastyq ornatýǵa jáne ekijaqty áriptestiktiń perspektivalaryn egjei-tegjeili talqylaýǵa qyzyǵýshylyq bildirdi.
Modast Djonatan Mero eldiń aǵymdaǵy áleýmettik-ekonomikalyq damýy jáne iri infraqurylymdyq jobalar týraly áńgimeledi. Kópjaqty yntymaqtastyq sheńberinde diplomattar BUU kún tártibindegi kóptegen máseleler boiynsha, onyń ishinde terrorizmge qarsy kúresý, Uiymdy reformalaý jáne Turaqty damý maqsattaryn júzege asyrý salalaryndaǵy ustanymdardyń uqsastyǵyn atap ótti. Osy jáne basqa salalardaǵy yntymaqtastyqty keńeitýge jáne halyqaralyq qurylymdarda ózara qoldaý kórsetý týraly kelisimge qol jetkizildi.
Tanzaniia Birikken Respýblikasy - halqynyń sany shamamen 55 million adamdy quraityn Shyǵys Afrikadaǵy eń úlken memleket. Resmi derekterge sáikes, eldiń Jalpy Ishki Ónim (JIÓ) ósimi 2017 jyly 7,1 paiyzdy qurady. JIÓ-niń tórtten biri aýyl sharýashylyǵy bolyp tabylady, bul eksporttyń 85 paiyzyn quraidy. Sońǵy jyldary halyqaralyq qarjy institýttardyń kómegi arqasynda Tanzaniia infraqurylymdyq jobalardy jáne altyn, temir, almaz, tanzanit degen tabiǵi resýrstardy belsendi damytýda.
