Qazaqstan sýperprezidenttik basqarý formasynan kúshti Parlamenti bar prezidenttik respýblikaǵa kóshedi. Bul týraly Memleket basshysy Qasym-Jomart Toqaev Qazaqstan halqyna Joldaýynda aitty, dep habarlaidy QazAqparat.
«Bizge Qazaqstan damýynyń saiasi modelin qaita qurý boiynsha syndarly qadamdar qajet. Munda eń aldymen, sýperprezidenttik basqarý formasynan kúshti Parlamenti bar prezidenttik respýblikaǵa túpkilikti kóshý týraly aitylyp otyr. Mundai júie bilik institýttarynyń qolaily teńgerimin qamtamasyz etedi jáne eldiń ornyqty damýyna yqpal etetin bolady. Aldymyzda Parlamenttiń rólin kúsheitý mindeti tur. Bul «Halyq únine qulaq asatyn memleket» tujyrymdamasyn tabysty júzege asyrýǵa jol ashady. Biz bolashaqta qandai el bolatynymzdy naqty bilemiz. Jańa Qazaqstandy azamattyq qoǵamy qalyptasqan tiimdi memleketke ainaldyramyz. Osyǵan orai kúshti Prezident – yqpaldy Parlament – esep beretin Úkimet qaǵidatyn basshylyqqa alamyz», - dedi Prezident.
Toqaev Qazaqstanda sýperprezidenttik basqarý nysany elimizdiń bastapqy kezeńinde oryndy bolǵanyn da atap ótti.
«Tek bastapqy kezeńde ǵana emes, 30 jyl boiy belgili bir deńgeide oryndy boldy. Biraq biz bir orynda turmaimyz. Qoǵam ózgerýde, el ózgerýde. Oǵan bizdiń saiasi júiemiz de beiimdelýge tiis. Qazir bári Prezidentke kelip tireledi, bul durys emes. Mundai tájiribeden birtindep ketý kerek. Memlekettiń uzaq merzimdi múddeleri men úshin biliktiń qosymsha tetikterinen jáne sitýatsiialyq yqpaldan da mańyzdyraq», - dedi Qasym-Jomart Toqaev.
