Qazaqstan Siriiaǵa óz áskeri qyzmetshilerin jiberý boiynsha eshkimmen kelissózder júrgizip jatqan joq. Bul týraly QR Syrtqy ister ministrliginen málim etti, dep habarlaidy "Ult aqparat".
«Múddeli taraptardyń kezdesýi úshin Qazaqstannyń Astanada alań usynýy elimizdiń Siriia daǵdarysyn retteýdegi naqty úlesi bolyp tabylady.
Qazaqstan Siriiaǵa óz áskeri qyzmetshilerin jiberý boiynsha eshkimmen kelissózder júrgizip jatqan joq. Siriiadaǵy tórt deeskalatsiia aimaǵynyń qaýipsizdigi men tiimdiligi qalai qamtamasyz etiletini qazirgi ýaqytta Astana protsesiniń kepilger-elderi quzyrynda. Olar osy jáne ózge de máselelerdi 4-5 shilde kúnderi Qazaqstan astanasynda ótetin kezekti kezdesý barysynda talqylaityn bolady.
Kez kelgen jaǵdaida álemniń qaisybir qaqtyǵys oshaǵyna óz bitimgerlerimizdi jiberý múmkindigin qarastyrýdyń mańyzdy qaǵidatty sharty - BUU Qaýipsizdik Keńesi qararynyń jáne osy uiymnyń tiisti mandatynyń bolýy», - delingen QR SIM-niń baspasóz qyzmeti taratqan habarda.
Aita keteiik, buǵan deiin reseilik BAQ-tarda Resei Siriiaǵa Qazaqstan men Qyrǵyzstannyń áskerlerin jiberý boiynsha kelissózder ótkizgendigi týraly aqparat jariialanǵan bolatyn.
