Qazaqstan shikizattyq emes taýarlar eksportyn 29 mlrd dolarǵa ulǵaitady. Bul nysandardy salý QR Ulttyq ekonomika ministrligi ázirlegen «Qazaqstandyqtardyń ál-aýqatyn arttyrýǵa baǵyttalǵan ornyqty ekonomikalyq ósý» ulttyq jobasy aiasynda qarastyrylǵan, dep habarlaidy QazAqparat.
QR UEM málimetinshe, jobanyń «Shikizattyq emes eksportty ilgeriletý» baǵytynda 2025 jylǵa qarai shikizattyq emes eksport kólemin 41 mlrd AQSh dollaryna deiin ósirý mindeti sheshiledi. Ol úshin jańa eksporttaýshylardy shyǵarýǵa jáne jumys istep jatqan eksporttaýshylardyń quzyretterin arttyrýǵa baǵyttalǵan eksporttyq akseleratsiia baǵdarlamasyn damytý jalǵasady. 1 000 belsendi eksporttaýshynyń syrtqy naryqtarǵa shyǵýy qamtamasyz etiledi. Sonymen qatar 350-ge jýyq eksporttaýshyny elektrondyq saýda platformalaryna (Alibaba, Amazon, OZON) shyǵarý josparlanǵan. Memlekettik etalondardyń halyqaralyq talaptarǵa sáikestigin qamtamasyz etý úshin synaq zerthanalyq bazalarynyń 30 paiyzy (250-den astam) jańǵyrtylady.
Eksporttaýshylardy syrtqy naryqtarǵa ilgeriletý úshin eksport aldyndaǵy jáne eksporttyq qarjylandyrý; saqtandyrý, ainalym qarajatyn tolyqtyrýǵa qarjylandyrý; eksporttaýshylardyń shyǵyndaryn óteý (saýda sóreleri men saýda alańdaryn jalǵa alý, sheteldik sertifikattaýdan, akkreditteýden, inspektsiiadan ótý, taýarlardy shetelde jarnamalaý, sheteldik kórmelerge, forýmdarǵa, jármeńkelerge, konkýrstarǵa qatysý); eksporttaýshylardyń kólik shyǵyndaryn óteý qamtamasyz etiledi.
«Nátijesinde shikizattyq emes taýarlardyń eksporty 14-ten 29 mlrd AQSh dollaryna ulǵaiady. Kórsetiletin qyzmetter eksportynyń ósýi 2,4 eseni (5-ten 12 mlrd AQSh dollary) quraidy», - dep atap ótedi ministrlikten.
Aita keteiik, QR Prezidenti Jarlyǵymen «Qazaqstandyqtardyń ál-aýqatyn arttyrýǵa baǵyttalǵan ornyqty ekonomikalyq ósý» ulttyq jobasy bekitilgen bolatyn. Joba 5 baǵyttan turady jáne 6 negizgi mindet pen 13 kórsetkish aiqyndalǵan.
