Foto: QR SIM baspasóz qyzmeti
Syrtqy ister ministrliginiń resmi ókili Shengen vizasyn berý kezinde azamattary úshin qosymsha konsýltatsiialar talap etiletin elderdiń tizbesine Qazaqstandy engizý máselesi týraly pikir bildirdi, - dep habarlaidy "Ult aqparat" vedomstvonyń baspasóz qyzmetine silteme jasap.
"Ózderińiz biletindei, 2020 jyly kúshine engen Qazaqstan jáne Eýropalyq odaq pen onyń múshe memleketteri arasyndaǵy Keńeitilgen áriptestik pen yntymaqtastyq týraly kelisimge sáikes, taraptar QR jáne Eýropalyq odaq azamattary úshin vizalyq rejimdi jeńildetý týraly kelisim boiynsha kelissózder júrgizý máselesi jóninde jan-jaqty dialog júrgizýge kelisti, sondai-aq adamdar arasyndaǵy bailanystarǵa járdemdesý jáne keńeitý mindettemelerin qabyldady.
Bul rette Qazaqstan 2017 jyldan bastap Eýropalyq odaq quramyndaǵy barlyq memlekettiń azamattaryna elimizge kelý úshin vizasyz rejim engizdi. Qazir SIM vizalyq rásimderdi jeńildetý jáne azamattarymyz úshin ózara qolaily tetikterdi ázirleý maqsatynda eýropalyq áriptesterimizben konsýltatsiialardy jalǵastyryp jatyr. Jaqyn arada Eýropalyq taraptan naqty qadamdar kútemiz" - dedi SIM baspasóz hatshysy Aibek Smadiiarov.
Vedomstvo ókiliniń sózinshe, biyl Qazaqstan men Eýropalyq odaq arasynda qarqyndy damyp kele jatqan diplomatiialyq qatynastardyń ornaǵanyna 30 jyl tolýy atap ótildi, sondai-aq taraptar keń aýqymdy máseleler boiynsha áriptestikti odan ári nyǵaitý jáne ilgeriletý úshin jumys istep jatyr.
"Qazaqstannyń qandai da bir tizimge engizilgeni týraly máselege keletin bolsaq, biz eýropalyq taraptan resmi habarlama alǵan joqpyz. Alaida jumys tártibinde bizge kelesini habarlady - 1 naýryzdan bastap Qazaqstan Shengen vizasyn berý kezinde budan bylai azamattary úshin qosymsha konsýltatsiialar talap etiletin elderdiń tizbesinde bolady. Sonymen qatar Shengen kelisiminde «qara» nemese «qyzyl» tizim degen uǵym joq, onda ádettegi jumys protsesi týraly aitylǵan.
Biz túsingendei, muny Shengen kelisiminiń bir eli suratty, óitkeni Eýropalyq odaq erejelerine sáikes, Eýropalyq odaq pen Shengen aimaǵy elderiniń viza alýǵa ótinish bergen úshinshi elderdiń azamattaryna qatysty qosymsha konsýltatsiialar bastaýǵa quqyǵy bar.
Mundai konsýltatsiialar jeti kúnge sozylýy múmkin. Bul rette vizalyq saýalnamalardy jalpy qaraýdyń standartty merzimi burynǵydai qalady – 15 kúnge deiin, iaǵni is júzinde bizdiń azamattarymyz úshin vizalardy qaraý rásiminde qandai da bir ózgerister kútilmeidi. Qaitalap aitqym keledi - is júzinde bizdiń azamattar úshin vizalardy qaraý rásiminde qandai da bir ózgerister bolmaidy" - dedi Smadiiarov.
Onyń aitýynsha, azamattaryna qatysty qosymsha konsýltatsiialar bastalýy múmkin 40 el kiretin tizim «qara tizim» dep atalmaidy, óitkeni olardyń arasynda Eýropalyq odaqpen tyǵyz qarym-qatynastary bar jáne qaýipsizdik jaǵynan qolaily Ortalyq Aziianyń barlyq elderi jáne Ázerbaijan, Armeniia, Marokko, Týnis, Iordaniia, Vetnam siiaqty birqatar el kiredi.
