Búginde Qazaqstanda 63 veterinariialyq baqylaý beketi bar, onda 228 memlekettik veterinariialyq-sanitariialyq inspektor qyzmet etedi, dep habarlaidy "Ult aqparat" QR Aýyl sharýashylyǵy ministrligine silteme jasap.
EAEO elderinen taýarlardy ótkizý kezinde baqylaýdy kúsheitý úshin qosymsha 32 veterinariialyq baqylaý beketi RF jáne Qyrǵyz Respýblikasy shekarasynyń boiynda ornatylǵan.
Atalmysh baqylaý beketterin ornatýǵa Qyrǵyzstandaǵy janýarlar aýrýy boiynsha qubylmaly jaǵdai jáne shekaranyń Resei jaǵy bóliginde aldyn ala habarlaý pýnktin qurýy sebep boldy.
2020 jyldyń basynan beri qosymsha ornatylǵan 32 veterinarlyq baqylaý beketinde 19,5 myń tonna taýar, millionǵa jýyq mal men qus, 32,3 mln taýyq jumyrtqa tasymaldaǵan 2 663 avtokólik tekserildi. Nátijesinde inspektorlar 93 avtokólikti keri qaitaryp, jalpy somasy 835 065 teńgege aiyppul saldy.
2019 jyl boiy veterinarlyq baqylaý beketterinde 755 myń tonnaǵa jýyq júk, 623,5 myń bas mal men qus, 70,7 mln jumyrtqa tasymaldaǵan 6 863 avtokólik tekserilip, onyń 213 júk kóligi keri qaitarylyp, million teńgeden astam aiyppul salyndy.
Budan basqa, Qazaqstannyń Ózbekstan Respýblikasy jáne QHR memlekettik shekarasy boiynda 31 syrtqy veterinarlyq-baqylaý beketi jumys istep tur (14 - avtojolda, 6–temirjolda, 2 – teńiz portynda, 9 – halyqaralyq áýejailarda).
Bul beketterde baqylaýdy 88 inspektor júzege asyrady.
16 naýryzdaǵy jaǵdai boiynsha syrtqy beketterde 1 286 avtokólik, 766 temir jol kóligi, 55 teńiz júgi qaraldy. Jalpy somasy 79 530 teńgege ákimshilik quqyq buzýshylyq týraly 6 hattama toltyryldy (júkterdi ilespe veterinariialyq qujattarsyz tasymaldaǵany úshin, veterinariialyq ruqsattyń bolmaýy, júrý baǵytyn saqtamaǵany, dezinfektsiia aktisiniń bolmaýy, qulaq syrǵalarynyń jáne t. b. bolmaýy), baqylaýdaǵy júgi bar 25 avtokólik keri qaitaryldy.
Barlyq 63 baqylaý-ótkizý beketterinde veterinariialyq inspektorlar júkterdi tekserý aktilerin avtomatty rejimde toltyrady jáne olardy QR Aýyl sharýashylyǵy ministrliginiń aqparattyq júiesine engizedi.
