Qazaqstan shekarasy mańynda býbon obasynyń qozdyrǵyshy tabyldy. Bul aqparatty QR Densaýlyq saqtaý ministrliginiń resmi ókili Baǵdat Qojahmetov rastady, dep habarlaidy "Ult aqparat".
Ortalyq kommýnikatsiialar qyzmetindegi brifing barysynda jýrnalister resmi ókilden: «Qazaqstan shekarasy mańynda býbon obasynyń qozdyrǵyshy tabyldy degen aqparat qanshalyqty ras? Atalǵan aýrýmen el aýmaǵynda tirkelgen naýqastar bar ma?», - dep suraǵan edi.
Óz kezeginde Baǵdat Qojahmetov bul aqparattyń rastalǵanyn atap ótti.
«Bul Mońǵoliiada, ásirese RF-nyń Altai ólkesinde tabiǵi býbondyq obany tasymaldaityn janýarlar mekendeitin jerlerde jyl saiyn tirkeledi. Qazaqstanda býbon obasymen aýyrdy nemese juqtyrdy degen derek joq. Nege deseńizder, shekarada tosqaýyl qoiylǵan. Sanitarlyq-epidemiologiialyq jumystar júrgizilýde», - dep jaýap berdi ol.
