Qańtar-tamyz aralyǵynda Qazaqstannan 44 mln tonna munai eksporttalyp, jospar 100 paiyz oryndaldy, dep habarlaidy QazAqparat.
Úkimet otyrysynda Energetika ministri Maǵzum Myrzaǵaliev osyndai málimet usyndy.
«Kórsetilgen kezeńde 56,1 mln tonna munai jáne kondensat óndirildi. Bul – osy jylǵa josparlanǵan kórsetkishtiń 99,3 paiyzy. Eseptik kezeńde «Qarashyǵanaq» jobasynda jospardyń tolyq oryndalmaýy baiqalady. Iaǵni, kesteden qalyp barady. Sebebi, Orynbor gaz óńdeý zaýytynda jóndeý jumystarynyń júrgizilýine bailanysty gaz qabyldaý shekteldi», - degen ministr munai-gaz salasyndaǵy iri kompaniialardyń kórsetkishterine toqtaldy.
«Teńiz» jobasynda atalǵan kezeńde 17,1 mln tonna munai óndirildi. Iaǵni osy jylǵy jospar 100 paiyz oryndaldy. Qashaǵan nemese Soltústik Kaspii jobasynda munai óndirý kólemi 10,2 mln tonnaǵa jetip, jospar asyra oryndaldy. «Qarashyǵanaq» jobasy boiynsha 7,8 mln tonna munai óndirilip, jospar 93 paiyz oryndaldy. Osy esepti kezeńde 44 mln tonna munai eksporttaldy. Iaǵni 8 aidyń jospary 100 paiyz oryndaldy», - dedi vedomstvo basshysy.
Onyń aitýynsha, gaz óndirý jospary 98 paiyz oryndalǵan.
«Gazǵa kelsek, esepti kezeńde 35,5 mlrd tekshe metr gaz óndirildi. Bul osy jylǵa josparlanǵan kórsetkishtiń 98 paiyzyna teń. Gaz óndirisiniń tómendeýi munai óndirý kólemine tikelei bailanysty. Óitkeni ol munai óndirý kezinde alynatyn ilespe gaz bolyp otyr. Taýarlyq gazdyń ishki tutyný kólemi josparmen salystyrǵanda 12 paiyz ósip, 11,6 mlrd tekshe metrge jetti», - dedi ministr.
