Tsifrlyq platformany "Ulttyq aqparattyq tehnologiialar" AQ otandyq IT mamandarmen birigip jasaidy. Eger qajettilik týyndasa, Qazaqstan sheteldik kompaniialardyń kómegine júginedi. Bul týraly tsifrlyq damý, innovatsiialar jáne aeroǵarysh ónerkásibi Baǵdat Mýsin málimdedi, dep habarlaidy Sputnik Qazaqstan tilshisi.
Onyń aitýynsha, ministrlik úkimetke tsifrlyq úkimet platformasyn otandyq IT-mamandardy tarta otyryp, ózimiz jasaiyq degen usynys engizgen. Oǵan úsh-bes jyl ýaqyt qajet eken. Úkimet bul usynysty maquldaǵan.
Osy oraida jýrnalister ministrden Qazaqstan reseilik Sber platformasyn nege satyp almaityn boldy, Reseige qarsy sanktsiialardyń áseri boldy ma dep surady.
"Biz endi ormanda júrgen joqpyz ǵoi. Álemdegi jáne elimizdegi jaǵdaiǵa qaraimyz. Bizge ishki naryqty ósirý kerek, deńgeiin kóterý kerek. Sol úshin bizge ýaqyt berildi. Buǵan deiin bizdiń usynysymyz ýaqyt talaptaryna sai bolmaǵandyqtan, basqa memleketten daiyn platformany satyp alý týraly sheshim qabyldaǵanbyz. Al endi bizge ýaqyt, IT qaýymdastyqqa múmkindik berilip otyr. Sondyqtan ony ózimiz jasaimyz", - dedi Mýsin.
Biraq eger otandyq mamandar júzege asyrmaityn qandai da bir komponent bolsa, Qazaqstan halyqaralyq kompaniialarǵa júginedi.
"Halyqaralyq kompaniialar arasynda "Sber" bolýy múmkin be" degen suraqqa Mýsin "ony qarastyramyz, men dál qazir ondai qajettilik kórip turǵan joqpyn" dep jaýap berdi.
Bul rette BAQ ókilderi "Sber" balamaly nusqa retinde qarala ma dep surady.
"Eger qajettilik bolsa, biz sheteldik sheshimderdi izdeimiz", - dedi ministr.
"Sheteldik kompaniialar degende Reseidi de meńzep tursyz ba?" dep naqtylady jýrnalister.
"Resei shetel emes pe", - dep suraqqa suraqpen jaýap berdi Mýsin.
Dese de, ol sheteldik kompaniialarǵa tańdaý jasaǵanda álemdegi jaǵdai, sonyń ishinde sanktsiialardyń bári eskeriletinin atap ótti.
"Biz ormanda ómir súrip jatqan joqpyz ǵoi. Qandai da bir tańdaý jasaǵanda, osy tustardyń bárin eskeremiz. Biz óz isimizge jaýap beretin memlekettik sheneýnikpiz. Bárine qarama-qaishy, negizsiz sheshimder qabyldamaimyz", - dedi Mýsin.
