Foto: QR SIM
Qazaqstan Aleksei Borodavkinniń daýly suhbatyna qatysty Resei tarapynan túsinikteme aldy. Bul týraly QR Syrtqy ister ministrliginiń resmi ókili Aibek Smadiiarov aitty, dep habarlaidy QazAqparat.
Búgin Syrtqy ister ministrligi ótip bara jatqan jyldy qorytyndylap, BAQ ókilderine baspasóz máslihatyn ótkizgen bolatyn. Is-shara barysynda tilshiler Aibek Smadiiarovtan: «Reseidiń Qazaqstandaǵy elshisi Aleksei Borodavkin «Elimizde ultshyldyqtyń kórinisteri bar. Kerek bolsa, Resei kómektese alady» dep aitty. Syrtqy ister ministrliginiń elshisiniń osy pikirine qatysty ustanymy qandai?», dep suraǵan edi.
«Bul máselege qatysty Resei elshisi Aleksei Borodavkinmen kezdesý ótkizildi. Sondai-aq Májilis tóraǵasy Erlan Qoshanov Resei elshisiniń sózine túsinik berdi. Sizder ony bilesizder. Reseidiń Syrtqy ister ministri Sergei Lavrov qazaqstandyq telearnalarǵa osy másele boiynsha túsinik bergen. Búginde másele jabyq dep sanaimyz, túsiniktemeler qabyldandy», - dep jaýap berdi ol.
Sonymen qatar ministrliktiń resmi ókili Qazaqstan men Resei arasyndaǵy qarym-qatynasty prezidentter anyqtaityndyǵyn basa aitty.
«Memleket basshysy Qasym-Jomart Toqaevtyń Reseige sońǵy sapary kezinde qos eldiń prezidentteri Máskeýde ótken kelissózderdiń qorytyndysyda diplomatiialyq qarym-qatynastyń ornaǵanyna 30 jyl tolýyna orai deklaratsiiaǵa qol qoidy. Prezidentimiz atap ótkendei, osy ýaqyt ishinde eki memleket dostyq pen tatý kórshiliktiń berik bailanysyna negizdelgen ózara tiimdi áriptestik qura aldy. Qazaqstan men Resei arasynda senimdi, syndarly dialog ornady. Yntymaqtastyqtyń joǵary deńgeiine qol jetkizildi», - dedi Aibek Smadiiarov.
Buǵan deiin Reseidiń Qazaqstandaǵy elshisi Aleksei Borodavkinniń bergen suhbatyna qatysty pikir bildirgen Májilis tóraǵasy Erlan Qoshanov «Elshiniń suhbatynyń kei tustary onyń mártebesine sai kelmeidi ári paida ákelmeidi dep oilaimyn. Borodavkin myrza óte tájiribeli diplomat, ol úgit-nasihatshylar men saiasattanýshylardyń jeteginde ketpeýi kerek», - degen bolatyn.
