Qazaqstan Respýblikasy Statimen daýda jeńdi. Belgiianyń apelliatsiialyq soty 530 million AQSh dollaryn quraityn tórelik sheshimdi taný jáne oryndaý týraly sheshimniń kúshin joiyp, Stati tórelik tribýnal men Shvetsiia sottaryn jańylystyrdy degen qorytyndyǵa keldi. Bul týraly QR Ádilet ministrliginen málim etti, dep habarlaidy QazAqparat.
«Moldova oligarhtary Anatol men Gabriel Statidi («Stati») jaýapqa tartý úshin uzaq kúreste Qazaqstan Respýblikasy túbegeili jeńiske jetti.
2021 jylǵy 16 qarashada Belgiianyń Apelliatsiialyq soty Statidiń iri kólemdegi alaiaqtyq shemaǵa qatysy bar, ol tek tórelik sotty ǵana emes, sonymen qatar sheshimniń kúshin joiý jónindegi protsess kezinde Shvetsiia sottaryn da jańylystyrdy degen sheshimdi shyǵardy. Sottyń pikirinshe, bul alaiaqtyq shema tórelik sottyń jaýapkershilik pen shyǵyndardy óteý máselelerine qatysty qorytyndylaryna tikelei áser etken. Sonyń negizinde Apelliatsiialyq sot tómengi satydaǵy sottyń 530 million AQSh dollaryn quraityn tórelik sheshimdi taný jáne oryndaý týraly sheshimniń tolyqtai kúshin joidy.
King & Spalding zań firmasy tórelikte Statidiń múddesin qorǵaǵan jáne olardyń jalǵan tórelik sheshimderin, sonyń ishinde Shvetsiia men Belgiiada taný jáne oryndaý boiynsha dúniejúzilik áreketterin úilestirgen», - delingen Ádilet ministrligi taratqan habarlamada.
Budan buryn habarlanǵandai, 2017 jylǵy jeltoqsanda Stati tórelik sheshimdi taný týraly syrttai qaýly aldy, ol keiinnen 2019 jylǵy jeltoqsanda Belgiianyń birinshi instantsiia sotynyń qaýlysymen rastaldy. Alaida, bul eki sheshim de Statidiń alaiaqtyǵynyń jańa dálelderin qamtymaityn shekteýli faktologiialyq bazaǵa negizdelgen.
2020 jyldyń qarashasynda Briýsseldiń apelliatsiialyq soty Statidiń qarsylyǵyna qaramastan, alaiaqtyq týraly materialdy tolyq kólemde usyný týraly Respýblikanyń ótinishin qanaǵattandyrdy.
Endi apelliatsiialyq sot Stati aýqymdy alaiaqtyq shemaǵa qatysqanyn jáne nátijesinde tórelik sheshim tanylmaýy nemese oryndalmaýy tiis degen Qazaqstan Respýblikasynyń pozitsiiasyn rastady.
«Apelliatsiialyq sottyń bul sheshimi Bank of New York Mellon-da saqtalatyn Qazaqstan Ulttyq qorynyń 530 million dollardan asatyn aktivterine ýaqytsha tyiym salýdyń kúshin joiýǵa negiz bolady», - dedi ministrlikten.
Qazaqstannyń Ádilet ministri Marat Beketaev bul máselege qatysty: «Bul Stati men olardyń sybailastaryna qarsy Respýblikanyń kópjyldyq kúresindegi mańyzdy sheshim. Statidiń alaiaqtyǵy týraly Respýblika usynǵan materialdardy tolyǵymen osy sot alǵash ret qarady. Barlyq qolda bar dáleldemelerdi muqiiat taldaǵannan keiin apelliatsiialyq sot bizdiń elge, Statidiń aýditorlaryna (KPMG), tórelik sotqa jáne tórelik sheshimniń kúshin joiýdy qaraǵan Shved sottaryna qatysty Statidiń alaiaqtyq jasaǵandyǵyn rastady. Bul sheshim Statige ǵana emes, sonymen qatar olardyń kásibi keńesshilerine de aýyr saldar týǵyzady. Bul Statige áli de kómektesip, olardyń zańsyz shemalaryna qoldaý kórsetetinder, sonyń ishinde Daniel Chapman men onyń Argentem Creek kompaniialar toby úshin «qaitarylmaityn» núkte bolýy tiis. Ádilet ministrliginiń atynan Stati men olardyń barlyq sybailastary jaýapqa tartylmaǵansha, biz óz ustanymymyzda turatyndyǵymyzdy habarlaimyz», - dep atap ótti.
Stati isine qatysty tolyq aqparat Ádilet ministrliginiń resmi saitynda ornalastyrylǵan.
