Qazaqstannyń Densaýlyq saqtaý ministrligi Reseimen arada koronavirýstan vaktsina pasporttaryn ózara taný týraly kelisimdi bekitýdi qoldap otyr.
Bul týraly Senattyń jalpy otyrysynan keiin tilshilerge suhbat bergen QR Densaýlyq saqtaý vitse-ministri — Bas memlekettik sanitarlyq dárigeri Aijan Esmaǵambetova málim etti, dep habarlaidy QazAqparat.
«Vaktsinalaý pasporttaryna toqtalsaq, Resei Federatsiiasynan kelisim Syrtqy ister ministrligi arqyly bizge keldi. QR Densaýlyq saqtaý ministrligi bul turǵyda óziniń ustanymyn jariialady, iaǵni biz osy kelisimge qol qoiýǵa daiynbyz. Qazirgi kezde QR Tsifrlyq damý, innovatsiialar jáne aeroǵarysh ónerkásibi ministrligimen tiisti jumystar júrgizilip jatyr, bul baǵytta tehnikalyq máselelerdi retteý kerek», - dedi A. Esmaǵambetova.
Osy oraida ol Tsifrlyq damý ministrligi tiisti qorytyndy jasaǵannan keiin, bul qujat QR Syrtqy ister ministrligi arqyly Reseidiń tiisti organdaryna joldanatynyn aitty.
Degenmen vitse-ministr pasporttardy ózara taný merzimi týraly naqty merzimdi naqtylai almady.
«Naqty merzim týraly aita almaimyn, biz ózimizdiń ustanymdy jariialadyq. Endigi másele tehnikalyq sipatta. Bul qadamdar QR Tsifrlyq damý, innovatsiialar jáne aeroǵarysh ónerkásibi ministrliginiń quzyretimen bailanysty», - dedi Esmaǵambetova.
30 naýryzda QR Densaýlyq saqtaý ministrligi Reseimen arada koronavirýstan vaktsinatsiia pasporttaryn ózara taný týraly kelisimniń jobasyn kelisýge aldy.
Budan buryn habarlanǵandai, biyl naýryz aiynda QR Bas sanitar dárigeriniń jańa qaýlysy boiynsha Qazaqstan Respýblikasynda koronavirýs infektsiiasyna qarsy vaktsinatsiia qujattary jaramdy elderdiń tizimi jańardy.
Jańartylǵan tizimde ańartylǵan tizimge 30-dan astam memleket kirip otyr.
