QR Mádeniet jáne sport ministri Arystanbek Muhamediuly Baiqońyrda týrizmdi damytýǵa kedergi bolyp turǵan faktorlardy atady, dep habarlaidy QazAqparat.
«Yntymaqtastyqtyń perspektivaly jobalarynyń biri - Baiqońyrda ǵaryshtyq týrizmdi belsendi damytý bolýy múmkin. Barsha álemde jabyq ǵarysh ailaqtaryna saparlaý óte joǵary qyzyǵýshylyq týdyrady. Mysaly, AQSh-tyń bas ǵarysh ailaǵy men onyń Florida shtatyndaǵy rejimdi nysandaryna jylyna 1 million týrist barady», - dedi A. Muhamediuly Qazaqstan men Reseidiń Óńiraralyq yntymaqtastyǵynyń XV forýmynda.
Osy oraida ol Baiqońyrda 18-den 24-ke deiin ushyrylym bolatynyn, oǵan 2 myńnan astam adam baratyndyǵyn jetkizdi. Mundai jaǵdai kóptegen quqyqtyq kedergilerge, áskeri vedomstvolar is-qimylyndaǵy kelispeýshilikke bailanysty bolyp otyr. Bul óz kezeginde Baiqońyrǵa týristerdiń saparlaryn shektep keledi.
Bul turǵyda QR Mádeniet jáne sport ministri atalǵan máseleni sheshý úshin Qazaqstan men Resei prezidentterinen tiisti qoldaý kórsetýin surady.
Budan buryn habarlanǵandai, Qazaqstan men Reseidiń Óńiraralyq yntymaqtastyǵynyń XV forýmynda QR Mádeniet jáne sport ministri Arystanbek Muhamediuly eki eldiń týrizm salasyn damytýdyń múmkindikterin baiandady.
Sonymen qatar onda Aqtaý sammiti Kaspii teńizindegi týrizmdi damytýǵa yqpal etkendigi aityldy.
