QR Konstitýtsiialyq Keńesi Prezident Nursultan Nazarbaevtyń ótinishi boiynsha qabyldaǵan Respýblika Konstitýtsiiasynyń 42-babynyń 3-tarmaǵyn resmi túsindirý týraly normativtik qaýlysyn jariia etti, dep habarlaidy "Ult aqparat".
Osyǵan deiin habarlanǵandai, Memleket basshysynyń ótinishinde «Konstitýtsiianyń 42-babynyń 3-tarmaǵynda belgilengen Qazaqstan Respýblikasy Prezidentiniń ókilettigin merziminen buryn toqtatý negizderiniń tizbesi tolyq bolyp tabylady ma?», degen suraq qoiylǵan bolatyn.
Konstitýtsiialyq Keńes atalǵan normada Prezidenttiń ókilettigin merziminen buryn toqtatý negizderi tolyq emes dep túsindirdi.
«Keńestiń pikirinshe, negizgi Zańnan Memleket basshysynyń otstavkaǵa shyǵý quqyǵy týyndaidy. Atalǵan quqyq prezidenttik basqarý nysany men Respýblika Prezidentiniń konstitýtsiialyq mártebesiniń elementi bolyp tabylady. Ol adam ári Qazaqstan azamaty retinde Prezidentke tiesili jáne ár tulǵanyń konstitýtsiialyq quqyqtaryn, sonyń ishinde eńbek etý bostandyǵyna, qyzmet pen kásip túrin erkin tańdaýyna quqyǵyn bekitetin Konstitýtsiianyń basqa da erejelerinen týyndaidy (13-baptyń 1-tarmaǵy, 24-baptyń 1-tarmaǵy jáne t.b.).
Konstitýtsiialyq Keńes Konstitýtsiia 42-babynyń 3-tarmaǵyndaǵy «sondai-aq Prezident qyzmetinen merziminen buryn bosatylǵan...jaǵdaida...» degen sóz tirkesi onyń ókilettigin merziminen buryn toqtatýdyń negizi retinde Memleket basshysynyń otstavkaǵa shyǵýyn da qamtidy dep esepteidi», - delingen Konstitýtsiialyq Keńes saitynda.
Normativtik qaýlynyń tolyq mátini baspasózde jariialanady.
Eske salaiyq, Memleket basshysy Konstitýtsiianyń 42-babynyń 3-tarmaǵyna resmi túsindirme berý týraly Konstitýtsiialyq Keńeske ótinish joldaǵan bolatyn. 2019 jylǵy 4 aqpanda Prezidenttiń ótinishi konstitýtsiialyq is júrgizýge qabyldanǵan edi.
