Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine soǵys jaǵdaiy máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy QazAqparat.
Zań jobasynyń negizgi maqsaty – soǵys jaǵdaiy salasyndaǵy zańnamany jetildirý. Bul elimizde qaýipsizdikke tónetin qaterge den qoiý úshin memlekettiń qorǵanys áleýetin qoldaý qajettiginen týyndap otyr.
Zań jobasymen Qazaqstan Respýblikasynyń Eńbek kodeksine jáne «Jumyldyrý daiyndyǵy men jumyldyrý týraly», «Memlekettik qupiialar týraly», «Soǵys jaǵdaiy týraly», «Qazaqstan Respýblikasynyń qorǵanysy jáne Qarýly Kúshteri týraly», «Bilim týraly» jáne «Áskeri qyzmet jáne áskeri qyzmetshilerdiń mártebesi týraly» zańdaryna túzetýler engiziledi.
«Onyń maqsaty – memlekettiń soǵys jaǵdaiy kezeńinde jumys isteýi, sonymen qatar beibit ýaqytta oǵan daiyndalý máselesin quqyqtyq retteý. Ásirese, «Soǵys jaǵdaiy týraly» Zańda Prezident ókilettigin tolyqtyrý usynylyp otyr. Ol beibit ýaqytta iske asyrylady. Bul soǵys jaǵdaiy salasyn qoldaný tártibin aiqyndaý, Qarýly Kúshter Joǵarǵy Bas qolbasshylyǵy Stavkasy týraly, Qorǵanys keńesteri týraly, soǵys jaǵdaiy kezeńinde Úkimet qyzmetin uiymdastyrý týraly erejeni bekitý bolyp otyr», - dedi QR Qorǵanys ministriniń birinshi orynbasary Murat Bektanov.
Odan basqa Úkimet qyzmeti mynadai ókilettikpen tolyqtyrylady: beibit ýaqytta soǵys jaǵdaiy kezeńindegi ministrlikter týraly erejeni bekitý, soǵys jaǵdaiy kezeńinde memlekettik organdy soǵys ýaqytyndaǵy shtatqa kóshirýdi uiymdastyrý, jergilikti atqarýshy organǵa azamattyq jáne aýmaqtyq qorǵanys salasyn qamtamasyz etý mindetin belgileý.
«Sonymen qatar, soǵys jaǵdaiy kezeńinde jergilikti atqarýshy organnyń ókilettigin kózdeý, olarǵa «oblystyń, respýblikalyq mańyzy bar qalanyń, astananyń qorǵanys keńesin» qurýǵa ókilettik berý usynylady. Bul rette qorǵanys keńesteri áskeri basqarý organy retinde soǵys jaǵdaiy salasynyń oryndalýyn qamtamasyz etedi. Olar tek soǵys jaǵdaiy kezeńine qurylady. Sondyqtan Qarýly Kúshter qurylymyna kirmeidi», - dep naqtylady vedomstvo ókili.
Munymen qosa, «Qorǵanys jáne Qarýly Kúshter týraly» Zańǵa qorǵanysty josparlaý boiynsha birqatar túzetý engizý usynyldy. Olar júieli túrde, iaǵni barlyq basqarý vertikaly boiynsha qaraldy. Árbir deńgeige tiisti ókilettik pen fýnktsiia engiziledi. Birinshiden, Prezident ókilettigin qorǵanysty josparlaý qaǵidasyn bekitýmen tolyqtyrý usynylady. Onda jospardyń qujattar jinaǵy, memlekettik organnyń qujatty ázirleý quzyreti kózdelgen.
«Áskeri qyzmet týraly» Zańǵa zapastaǵy serjantty daiarlaý boiynsha birneshe túzetý engiziledi. Áskeri rezervti tolyqtyrý maqsatynda áskeri kafedrada aqyly negizde zapastaǵy serjantty daiarlaý usynylady. «Bilim týraly» Zańǵa joǵary bilim berý uiymyna osy baǵdarlama boiynsha aqyly negizde zapastaǵy serjantty daiarlaý ókilettigin berý arqyly tolyqtyrý usynyldy», - dedi Qorǵanys ministriniń birinshi orynbasary.
