QR Prezidentiniń baspasóz hatshysy Berik Ýáliden koronavirýs anyqtaldy. Bul týraly ol Facebook-tegi paraqshasynda habarlady.
«Ardaqty aǵaiyn! Ókinishke qarai, búgin asa bir jaisyz jańalyqty jariialaiyn dep otyrmyn. Álemdi ainalyp, elimizdi sharlap ketken koronavirýs indeti menen de tabyldy. Keshe tapsyrǵan test qorytyndysy oń nátije berdi. Qazir aýrýhanada, dárigerlerdiń qaraýynda jatyrmyn. Jaǵdaiym bir qalypty. Asa alańdaityndai emes. Em qabyldaýdamyn» dep jazdy ol.
Sondai-aq, QR Prezidentiniń baspasóz hatshysy Prezident belgilengen kestege sáikes jumys istep jatqanyn atap ótti. Memleket basshysynyń densaýlyǵyna eshqandai qaýip tónip turmaǵanyn, Qasym-Jomart Kemeluly únemi test tapsyryp, qorytyndysyn alyp otyrǵanyn málimdedi. Aqordada sanitarlyq rejim kúsheitilip, qaýipsizdik sharalary qataitylǵany týraly aitty.
«Osy indet bastalǵaly barlyǵymyz dabyl qaǵyp, saqtanýǵa, dertti juqtyrmaýdyń joldaryn qarastyrýǵa shaqyryp kelemiz. Biraq pandemiiaǵa senbeitin, aýrýdy joq deýshiler azaimai tur. Ondaida «Aýyrǵan adamdy kórsetińdershi«, «Meniń tanysymnyń birde-biri aýyrǵan joq. Sonda onymen kim aýyryp jatyr?», «Aýyrǵan adamdardyń attaryn nege atamaidy?« degen siiaqty pikirlerdi jii estitinbiz. Mine, men dert juqtyrdym, ony jasyrmai jariialap otyrmyn. Mundaǵy maqsat alańsyz júrgen azamattar oilansyn, senbei júrgen kisilerdiń kózi jetsin degenim. Aýrý bar. Ony juqtyrýshylardyń sany kún saiyn artyp jatyr. Qansha jerden saqtyq sharalaryn qatań saqtap júrsek te, biz de juqtyrdyq. Endi emdelý kerek» dep jazdy ol.
Sóz sońynda Berik Ýáli jurtshylyqty saqtyqqa shaqyrdy: «Barshańyzdy ózderińizdiń jáne jaqyndaryńyzdyń densaýlyǵyn saqtaý úshin karantin rejimi men profilaktikalyq sharalardy ustanýǵa shaqyramyn. Pandemiiaǵa jeńil-jelpi qaraýǵa bolmaidy
Sondai-aq Berik Ýáli Instagram paraqshasynda meditsinalyq zertteý fotosyn jariialady.
