Qazaqstan Prezidenti Qasym-Jomart Toqaev Resei Prezidenti Vladimir Pýtinmen telefon arqyly sóilesti, dep habarlaidy Aqorda.
Memleketter basshylary shekaralas elderdegi koronavirýstyń taralýyna tosqaýyl qoiý jónindegi is-qimyldarǵa qatysty máselelerdi talqylady.
Prezidentter Qazaqstan men Resei úkimetteriniń belsendi bailanystaryn atap ótip, eki eldiń atqarýshy organdary is-áreketteriniń úilesimdiligin kúsheitýge bailanysty ortaq pikir aitty. Qasym-Jomart Toqaev Vladimir Pýtinge synama-júiesiniń 40 myń jiyntyǵyn bergeni úshin rizashylyǵyn bildirdi. Resei Prezidenti óndiristiń ulǵaiý múmkindigine qarai gýmanitarlyq kómek retinde beriletin synama-júiesiniń jiyntyqtar sanyn arttyra túsetinin jetkizdi.
Qasym-Jomart Toqaev Vladimir Pýtinge Resei arqyly keletin jáne shekaralyq aimaqtaǵy Qazaqstan azamattarynyń qaitýyna yqpal etýdi surady. Vladimir Pýtin týyndaǵan máseleni sheshýge Resei úkimeti kómektesetinin aitty.
Resei Prezidenti saýda-ekonomikalyq yntymaqtastyqty odan ári keńeitýdiń jáne Eýraziialyq ekonomikalyq odaq aiasynda ózara is-qimyldardy nyǵaitýdyń mańyzdylyǵyn atap ótti.
Qazaqstan Prezidenti Qasym-Jomart Toqaev reseilik áriptesin konstitýtsiialyq reformalardyń tabysty júzege asyrylýymen quttyqtap, jalpyulttyq daýys berýdiń oń nátije beretinine senim bildirdi.
