Qazaqstan Prezidenti Semeidegi Jedel meditsinalyq járdem aýrýhanasyna bardy, dep habarlaidy "Ult aqparat" Aqordaǵa silteme jasap.
Memleket basshysyna óńirdegi densaýlyq saqtaý júiesiniń damý barysy jóninde málimet berilip, oblystyń osy salada jetken jetistikteri týraly baiandaldy.
Sondai-aq, Qazaqstan Prezidenti «100 mektep – 100 aýrýhana» baǵdarlamasy aiasynda salynǵan kóp salaly aýrýhananyń jumysymen tanysty. Qasym-Jomart Toqaevqa meditsinalyq mekemeniń emdeý-saýyqtyrý, ota jasaý bólmeleri kórsetilip, negizgi qyzmet baǵyty jóninde málimet berildi.
Jalpy aýmaǵy 44,5 myń sharshy metr bolatyn aýrýhanada 800-den astam qyzmetker jumys isteidi. Bir ýaqytta 345 naýqasty qabyldap, alǵashqy meditsinalyq qyzmet kórsete alady.
Qazaqstan Prezidenti Jedel meditsinalyq járdem aýrýhanasynyń qyzmetkerlerimen áńgimelesý barysynda óńirde mamandandyrylǵan joǵary tehnologiialyq meditsinalyq mekemelerdiń, respýblikalyq ǵylymi ortalyqtardyń bólimshelerin ashý jóninde aýqymdy jumystar júrgizilip jatqanyn aitty. Densaýlyq saqtaý salasyn tolyqtai tsifrlandyrýdyń mańyzdylyǵyna toqtaldy.
Sońynda Qazaqstan Prezidenti meditsinalyq mekeme ujymyna tabys tiledi.
