QR Prezidenti Qasym-Jomart Toqaev pen Ońtústik Koreia Prezidenti Mýn Chje In Koreia biznesiniń kóshbasshylarymen kezdesý ótkizdi. Jiynǵa qazaqstandyq iri kásiporyndardyń basshylary da qatysty, dep habarlaidy "Ult aqparat" Aqordaǵa silteme jasap.
Qazaqstan Prezidenti sóz basynda Mýn Chje Inge Koreia Respýblikasyna memlekettik sapardy jáne osy is-sharany uiymdastyrǵany úshin rizashylyǵyn bildirdi. Memleket basshysy Seýge saparynyń baǵdarlamasy asa tyǵyz ekenin atap ótti.
– 20-shy jáne 21-shi ǵasyrdaǵy tarihqa kóz júgirtsek, qazaqtar men koreilerdiń júrip ótken joly kúrdeli, úlken synaqtardan synbai ótkenin baiqaýǵa bolady. Dálirek aitqanda Azamattyq soǵysyna da, Uly Otan soǵysyna da qatysty. Babalarymyz kóptegen syn tezinen ótti. Soǵan qaramastan, bizdiń halyqtarymyz bir birine iyq tirestire otyryp, qiynshylyqtardy jeńe bildi. Qazaqtar men koreiler baýyrlas halyqtarǵa ainaldy, – dedi Memleket basshysy.
Bul rette Qasym-Jomart Toqaev Ońtústik Koreia bizdiń eldiń iri syrtqy saýda jáne ekonomikalyq áriptesteriniń biri ekenin atap ótti.
Qazaqstan Prezidenti koreialyq biznes ókilderiniń azyq-túlik, taý-ken baiytý, avtomobil jáne ekonomikanyń basqa da sektorynda tabysty eńbek etip jatqanyn atap ótti. Qasym-Jomart Toqaevtyń aitýynsha, qazaq-korei yntymaqtastyǵynyń zor áleýeti áli de tolyq ashylmaǵan.
Memleket basshysy Qazaqstan óziniń 19 milliondyq naryǵynan bólek, Eýraziialyq ekonomikalyq odaqqa kirý úshin tiimdi alańnyń qyzmetin atqara alady dep esepteidi.
– Qazaqstan 75 million turǵyny bar Ortalyq Aziianyń ekonomikalyq turǵydan eń damyǵan eli bolyp esepteledi. Zamanaýi quqyqtyq, salyqtyq jáne qarjylyq júie men Ortalyq Aziiadaǵy mindetti tólemdersiz saýda júiesi, Qazaqstandy osy aimaqta jumys isteýge eń qolaily alańǵa ainaldyryp otyr, – dedi Memleket basshysy.
Prezident bizdiń eldegi investitsiialyq ahýal týraly aita kele, korei tarapyn jańa erejelermen, iaǵni, jeke qoldaý sharalary, zańnamalyq turaqtylyq jáne strategiialyq investorlarǵa erekshe jaǵdai jasaýdy qamtityn «Strategiialyq investitsiialyq kelisimmen» tanystyrdy. Memleket basshysynyń aitýynsha, bul tetik «Samal jel» ekonomikalyq yntymaqtastyq tujyrymdamasyn júzege asyrýǵa da negiz bolmaq.
Sonymen qatar Qasym-Jomart Toqaev jer qoinaýyn paidalaný, innovatsiialar men jańa tehnologiialar, atom, balamaly jáne jańartylatyn qýat kózderi, munai-gaz, mashina jasaý salalarynda tiimdi jobalar júzege asyrýǵa múmkindik mol ekenin atap ótti.
Memleket basshysy bulardyń ózi yntymaqtastyq ornatýǵa bolatyn barlyq baǵyt emes ekenin aitty. Ol metallýrgiia, avtomobil jáne azyq-túlik óndirisi, densaýlyq saqtaý jáne bilim salalarynda Ońtústik Koreianyń úlken jetistikterge jetkenin atap ótti.
Prezident osy asa qiyn jolda jinaqtaǵan tájiribe, bilim men tehnologiialar Qazaqstanda da úlken suranysta ekenin jetkizdi. Onyń aitýynsha, Qazaqstan búginde ekonomikany tsifrlandyrý jáne jańa tehnologiialarǵa kóshirý kezeńinde.
–Biz investitsiialyq jáne tehnologiialyq yntymaqtastyqtyń barlyq baǵyty boiynsha jumys isteýge daiynbyz. Ol úshin qarjylyq ta, materialdyq ta múmkindikter men damyǵan infraqurylym bar. Eń bastysy – basshylyqtyń saiasi nieti túzý, memleketterimizdiń arasynda tatý bailanys ornaǵan. Sondyqtan, men bizdiń yntymaqtastyǵymyzdyń bolashaǵyna zor úmit artamyn. Qazaqstan Respýblikasynyń Prezidenti retinde qol jetkizilgen kelisimderdiń júzege asyrylýyna jáne jalpy elderimizdiń ekonomikalyq yntymaqtastyǵyn nyǵaitýǵa baǵyttalǵan barlyq is-qimyldarǵa monitoring júrgizip, jiti baqylap otyratynymdy taǵy qaitalap aitamyn, – dedi Qasym-Jomart Toqaev.
Prezidenti Mýn Chje In óz sózinde Qazaqstanmen birlesken investitsiialyq jobalardyń júzege asyrylýyna Ońtústik Koreia Úkimet tarapynan tolyq qoldaý bolatynyn aitty.
Is-shara barysynda koreialyq «Hyunday Motor Company», «Samsung Electronics», «Doosan Heavy Industries & Construction», «Lotte Confectionery», «POSCO International», «Celltrion, Dongil Construction», «KOTRA» kompaniialarynyń jetekshileri sóz sóiledi.
Qazaqstan tarapynan Premer-Ministrdiń orynbasary Roman Skliar, «Samuryq-Qazyna» UÁQ tóraǵasy, «Kaspi.kz» AQ direktorlar keńesiniń tóraǵasy, «Mineral Product» JShS-nyń quryltaishysy baiandamalar jasady.
