قر پرەزيدەنتٸ قاسىم-جومارت توقاەۆ پەن وڭتٷستٸك كورەيا پرەزيدەنتٸ مۋن چجە ين كورەيا بيزنەسٸنٸڭ كٶشباسشىلارىمەن كەزدەسۋ ٶتكٸزدٸ. جيىنعا قازاقستاندىق ٸرٸ كەسٸپورىنداردىڭ باسشىلارى دا قاتىستى, دەپ حابارلايدى "ۇلت اقپارات" اقورداعا سٸلتەمە جاساپ.
قازاقستان پرەزيدەنتٸ سٶز باسىندا مۋن چجە ينگە كورەيا رەسپۋبليكاسىنا مەملەكەتتٸك ساپاردى جەنە وسى ٸس-شارانى ۇيىمداستىرعانى ٷشٸن ريزاشىلىعىن بٸلدٸردٸ. مەملەكەت باسشىسى سەۋگە ساپارىنىڭ باعدارلاماسى اسا تىعىز ەكەنٸن اتاپ ٶتتٸ.
– 20-شى جەنە 21-شٸ عاسىرداعى تاريحقا كٶز جٷگٸرتسەك, قازاقتار مەن كورەيلەردٸڭ جٷرٸپ ٶتكەن جولى كٷردەلٸ, ٷلكەن سىناقتاردان سىنباي ٶتكەنٸن بايقاۋعا بولادى. دەلٸرەك ايتقاندا ازاماتتىق سوعىسىنا دا, ۇلى وتان سوعىسىنا دا قاتىستى. بابالارىمىز كٶپتەگەن سىن تەزٸنەن ٶتتٸ. سوعان قاراماستان, بٸزدٸڭ حالىقتارىمىز بٸر بٸرٸنە يىق تٸرەستٸرە وتىرىپ, قيىنشىلىقتاردى جەڭە بٸلدٸ. قازاقتار مەن كورەيلەر باۋىرلاس حالىقتارعا اينالدى, – دەدٸ مەملەكەت باسشىسى.
بۇل رەتتە قاسىم-جومارت توقاەۆ وڭتٷستٸك كورەيا بٸزدٸڭ ەلدٸڭ ٸرٸ سىرتقى ساۋدا جەنە ەكونوميكالىق ەرٸپتەستەرٸنٸڭ بٸرٸ ەكەنٸن اتاپ ٶتتٸ.
قازاقستان پرەزيدەنتٸ كورەيالىق بيزنەس ٶكٸلدەرٸنٸڭ ازىق-تٷلٸك, تاۋ-كەن بايىتۋ, اۆتوموبيل جەنە ەكونوميكانىڭ باسقا دا سەكتورىندا تابىستى ەڭبەك ەتٸپ جاتقانىن اتاپ ٶتتٸ. قاسىم-جومارت توقاەۆتىڭ ايتۋىنشا, قازاق-كورەي ىنتىماقتاستىعىنىڭ زور ەلەۋەتٸ ەلٸ دە تولىق اشىلماعان.
مەملەكەت باسشىسى قازاقستان ٶزٸنٸڭ 19 ميلليوندىق نارىعىنان بٶلەك, ەۋرازييالىق ەكونوميكالىق وداققا كٸرۋ ٷشٸن تيٸمدٸ الاڭنىڭ قىزمەتٸن اتقارا الادى دەپ ەسەپتەيدٸ.
– قازاقستان 75 ميلليون تۇرعىنى بار ورتالىق ازييانىڭ ەكونوميكالىق تۇرعىدان ەڭ دامىعان ەلٸ بولىپ ەسەپتەلەدٸ. زاماناۋي قۇقىقتىق, سالىقتىق جەنە قارجىلىق جٷيە مەن ورتالىق ازيياداعى مٸندەتتٸ تٶلەمدەرسٸز ساۋدا جٷيەسٸ, قازاقستاندى وسى ايماقتا جۇمىس ٸستەۋگە ەڭ قولايلى الاڭعا اينالدىرىپ وتىر, – دەدٸ مەملەكەت باسشىسى.
پرەزيدەنت بٸزدٸڭ ەلدەگٸ ينۆەستيتسييالىق احۋال تۋرالى ايتا كەلە, كورەي تاراپىن جاڭا ەرەجەلەرمەن, ياعني, جەكە قولداۋ شارالارى, زاڭنامالىق تۇراقتىلىق جەنە ستراتەگييالىق ينۆەستورلارعا ەرەكشە جاعداي جاساۋدى قامتيتىن «ستراتەگييالىق ينۆەستيتسييالىق كەلٸسٸممەن» تانىستىردى. مەملەكەت باسشىسىنىڭ ايتۋىنشا, بۇل تەتٸك «سامال جەل» ەكونوميكالىق ىنتىماقتاستىق تۇجىرىمداماسىن جٷزەگە اسىرۋعا دا نەگٸز بولماق.
سونىمەن قاتار قاسىم-جومارت توقاەۆ جەر قويناۋىن پايدالانۋ, يننوۆاتسييالار مەن جاڭا تەحنولوگييالار, اتوم, بالامالى جەنە جاڭارتىلاتىن قۋات كٶزدەرٸ, مۇناي-گاز, ماشينا جاساۋ سالالارىندا تيٸمدٸ جوبالار جٷزەگە اسىرۋعا مٷمكٸندٸك مول ەكەنٸن اتاپ ٶتتٸ.
مەملەكەت باسشىسى بۇلاردىڭ ٶزٸ ىنتىماقتاستىق ورناتۋعا بولاتىن بارلىق باعىت ەمەس ەكەنٸن ايتتى. ول مەتاللۋرگييا, اۆتوموبيل جەنە ازىق-تٷلٸك ٶندٸرٸسٸ, دەنساۋلىق ساقتاۋ جەنە بٸلٸم سالالارىندا وڭتٷستٸك كورەيانىڭ ٷلكەن جەتٸستٸكتەرگە جەتكەنٸن اتاپ ٶتتٸ.
پرەزيدەنت وسى اسا قيىن جولدا جيناقتاعان تەجٸريبە, بٸلٸم مەن تەحنولوگييالار قازاقستاندا دا ٷلكەن سۇرانىستا ەكەنٸن جەتكٸزدٸ. ونىڭ ايتۋىنشا, قازاقستان بٷگٸندە ەكونوميكانى تسيفرلاندىرۋ جەنە جاڭا تەحنولوگييالارعا كٶشٸرۋ كەزەڭٸندە.
–بٸز ينۆەستيتسييالىق جەنە تەحنولوگييالىق ىنتىماقتاستىقتىڭ بارلىق باعىتى بويىنشا جۇمىس ٸستەۋگە دايىنبىز. ول ٷشٸن قارجىلىق تا, ماتەريالدىق تا مٷمكٸندٸكتەر مەن دامىعان ينفراقۇرىلىم بار. ەڭ باستىسى – باسشىلىقتىڭ ساياسي نيەتٸ تٷزۋ, مەملەكەتتەرٸمٸزدٸڭ اراسىندا تاتۋ بايلانىس ورناعان. سوندىقتان, مەن بٸزدٸڭ ىنتىماقتاستىعىمىزدىڭ بولاشاعىنا زور ٷمٸت ارتامىن. قازاقستان رەسپۋبليكاسىنىڭ پرەزيدەنتٸ رەتٸندە قول جەتكٸزٸلگەن كەلٸسٸمدەردٸڭ جٷزەگە اسىرىلۋىنا جەنە جالپى ەلدەرٸمٸزدٸڭ ەكونوميكالىق ىنتىماقتاستىعىن نىعايتۋعا باعىتتالعان بارلىق ٸس-قيمىلدارعا مونيتورينگ جٷرگٸزٸپ, جٸتٸ باقىلاپ وتىراتىنىمدى تاعى قايتالاپ ايتامىن, – دەدٸ قاسىم-جومارت توقاەۆ.
پرەزيدەنتٸ مۋن چجە ين ٶز سٶزٸندە قازاقستانمەن بٸرلەسكەن ينۆەستيتسييالىق جوبالاردىڭ جٷزەگە اسىرىلۋىنا وڭتٷستٸك كورەيا ٷكٸمەت تاراپىنان تولىق قولداۋ بولاتىنىن ايتتى.
ٸس-شارا بارىسىندا كورەيالىق «Hyunday Motor Company», «Samsung Electronics», «Doosan Heavy Industries & Construction», «Lotte Confectionery», «POSCO International», «Celltrion, Dongil Construction», «KOTRA» كومپانييالارىنىڭ جەتەكشٸلەرٸ سٶز سٶيلەدٸ.
قازاقستان تاراپىنان پرەمەر-مينيستردٸڭ ورىنباسارى رومان سكليار, «سامۇرىق-قازىنا» ۇەق تٶراعاسى, «Kaspi.kz» اق ديرەكتورلار كەڭەسٸنٸڭ تٶراعاسى, «Mineral Product» جشس-نىڭ قۇرىلتايشىسى باياندامالار جاسادى.
