Beijiń qalasyndaǵy Halyq jinalysy úiinde Qazaqstan Prezidenti Qasym-Jomart Toqaev pen Qytai Halyq Respýblikasynyń Tóraǵasy Si Tszinpin kelissóz júrgizdi, dep habarlaidy Aqordanyń baspasóz qyzmeti.
Ózara senim men dostyqqa negizdelgen kezdesýde kóshbasshylar Qazaqstan men Qytai arasyndaǵy jan-jaqty strategiialyq seriktestiktiń, sonyń ishinde saiasi, saýda-ekonomikalyq, kólik-tranzittik jáne mádeni-gýmanitarlyq salalardyń aýqymdy máselelerin talqylady.
Qazaqstan Prezidenti Qytai Tóraǵasyna iltipat bildirip, qysqy Olimpiada oiyndarynyń saltanatty ashylý rásimi keremet uiymdastyrylǵanyn atap ótti.
– Beijińdegi Olimpiada oiyndary búkil adamzat úshin jaýapty sátte ótip jatyr. Bul sport saiystary jańarýǵa úndep, pandemiianyń syn-qaterlerin eńserýge úles qosady. Sondyqtan Sizdiń shaqyrýyńyzdy zor qýanyshpen qabyl aldym, – dedi Memleket basshysy.
Prezident elimizdegi jaǵdaidy turaqtandyrýǵa baǵyttalǵan kúsh-jigerine berik dostyq nietin bildirgeni, sondai-aq Jańa Qazaqstan qurý jolynda qajetti kómek kórsetýge daiyndyǵy úshin Qytai Tóraǵasyna rizashylyǵyn jetkizdi.
Sonymen qatar Qasym-Jomart Toqaev Si Tszinpinniń tiimdi basshylyǵymen qol jetkizgen Qytai ekonomikasynyń damý jetistikterine joǵary baǵa berdi.
Prezident diplomatiialyq qatynastar ornaǵan 30 jyl ishindegi qazaq-qytai qatynastarynyń damýy týraly aita kele, eki eldiń kúsh biriktire otyryp, barlyq saladaǵy strategiialyq seriktestiktiń berik irgetasyn qalaǵanyna nazar aýdardy. Onyń pikirinshe, bul yntymaqtastyq máńgi, jan-jaqty jáne saiasi koniýnktýraǵa baǵynyshty emes.
Qazaqstan Prezidenti búgingi kelissózdiń qazaq-qytai qarym-qatynasy tarihyndaǵy sapaly ári jańa kezeńge birlese qadam basýǵa múmkindik beretinin atap ótti.
Qasym-Jomart Toqaev qazaq-qytai dostyǵyn, tatý kórshilik pen ózara syilastyqty nyǵaitýda jańa tabystarǵa qol jetkizý úshin tyǵyz yntymaqtastyqqa ázir ekenin atap ótip, Si Tszinpindi biylǵy qyrkúiekte Qazaqstanǵa memlekettik saparmen kelýge shaqyrdy.
Memleket basshysynyń pikirinshe, QHR Tóraǵasynyń sapary eki el arasyndaǵy strategiialyq seriktestikke tyń serpin beredi.
Kelissóz barysynda saýda-ekonomikalyq bailanystardy arttyrýdaǵy birlesken is-qimylǵa erekshe nazar aýdaryldy. Prezident pandemiiaǵa qaramastan, ekijaqty taýar ainalymy 2021 jyldyń qorytyndysy boiynsha 15,2 paiyzǵa ósip, 18,2 milliard dollarǵa jetkenin atap ótti. Qytai men Ortalyq Aziianyń bes eli arasyndaǵy jalpy saýdanyń jartysy Qazaqstanǵa tiesili.
Sonymen qatar Qasym-Jomart Toqaev «Bir beldeý, bir jol» bastamasyn odan ári iske asyrý jónindegi basym mindetti atady. Memleket basshysy elimizdiń tsifrlyq tehnologiialar men kólik jáne logistika salalaryndaǵy yntymaqtastyqty nyǵatiýǵa múddeli ekenine toqtaldy.
Kelissóz barysynda týrizm jáne mádeni-gýmanitarlyq bailanystar salasyndaǵy yntymaqtastyqty damytýdyń perspektivasy, sondai-aq Qazaqstanda qytai mádeni ortalyǵyn ashý máselesi talqylandy.
QHR Tóraǵasy «birtutas Qytai» qaǵidatyna qoldaý kórsetkeni úshin Qasym-Jomart Toqaevqa alǵys aityp, strategiialyq yntymaqtastyqty odan ári jan-jaqty damytýǵa múddeli ekenine senim bildirdi.
Si Tszinpin Qazaqstan men QHR arasyndaǵy bailanystardyń aldaǵy 30 jyldaǵy altyn dáýirine osy kezdesý jol ashatynyn atap ótti.
QHR Tóraǵasy «Bir beldeý - bir jol» bastamasy júzege asyrylyp jatqan 9 jyl ishindegi oń yntymaqtastyqty atap ótti. Sondai-aq Si Tszinpin aýyl sharýashylyǵy, jasyl energetika, jasandy intellekt, qarjy jáne elektrondy saýda salalaryndaǵy ózara yqpaldastyqtyń keleshegine de basa mán berdi.
Qytai basshysy Si Tszinpin Qasym-Jomart Toqaevtyń parasatty ári kóregen basshylyǵymen Qazaqstannyń qýatty ári órkendegen memleketke ainalatynyna senim bildirdi. Sondai-aq ol Aziiadaǵy ózara is-qimyl jáne senim sharalary jónindegi keńestiń jumysyna jáne onyń óńirlik qaýipsizdikti qamtamasyz etý jónindegi bastamalaryna joǵary baǵa berdi.
Kezdesý sońynda Si Tszinpin Qasym-Jomart Toqaevtyń Qazaqstanǵa shaqyrýyn qabyl alyp, aldaǵy kúzde elimizge memlekettik saparmen kelý jónindegi josparymen bólisti.
Sonymen qatar Si Tszinpin Qasym-Jomart Toqaevpen turaqty bailanys jasap turýǵa daiyn ekenin jetkizdi.
