Qazaqstan Prezidenti Finliandiianyń Syrtqy saýda jáne halyqaralyq damýdy qoldaý ministri Ville Skinnaridi qabyldady, dep habarlaidy Aqorda.
Qasym-Jomart Toqaev Nur-Sultan qalasyna jumys saparymen kelgen Finliandiianyń Syrtqy saýda jáne halyqaralyq damýdy qoldaý ministri, Saýda-ekonomikalyq yntymaqtastyq jónindegi úkimetaralyq komissiianyń teń tóraǵasy Ville Skinnaridi qabyldady.
Memleket basshysy ministrge iltipat bildirip, Qazaqstannyń syrtqy saiasatynda Sýomidiń mańyzdy ról atqaratynyn atap ótti.
– Finliandiia Soltústik Eýropa elderi arasyndaǵy Qazaqstannyń eń iri investory. Biz dostas eki eldiń belsendi ári jan-jaqty yntymaqtastyǵyn joǵary baǵalaimyz, – dedi Prezident.
Memleket basshysy joǵary deńgeidegi turaqty saiasi dialogty qoldaý qajet ekenine nazar aýdardy. Qasym-Jomart Toqaev Finliandiia Prezidenti Saýli Niinistioge júrekjardy sálemin joldap, ony Qazaqstanǵa resmi saparmen kelýge shaqyrdy.
Ville Skinnari Qasym-Jomart Toqaevqa kezdesýge múmkindik jasaǵany úshin alǵys aityp, pandemiia bastalǵannan bergi alǵashqy resmi saparyn Qazaqstannan bastaǵanyn atap ótti.
Ol Memleket basshysyna Finliandiia Prezidentiniń sálemin jetkizdi.
– Bizdiń elderimiz arasyndaǵy ekijaqty qarym-qatynas óte jaqsy. Finliandiianyń táýelsizdik alǵanyna 100 jyldan asty, al Qazaqstanǵa – 30 jyl. Pandemiia aiaqtalǵannan keiin ekijaqty bailanystardy damytýdyń jańa kezeńi bastalatynyna senimdimiz. Saiasi dialogty tereńdetýde Qazaqstan men Finliandiianyń áleýeti zor. Ásirese, ózara saýda-sattyqty damytý jáne investitsiia tartý mańyzdy, – dedi Finliandiia ministri.
Qasym-Jomart Toqaev birlesken jobalardy júzege asyrýda, ásirese, jasyl tehnologiialar men telekommýnikatsiia salalaryna basymdyq beriletinin jetkizdi.
Prezident sheteldik investorlar men fin tehnologiiasyn transfertteýge bizdiń elimizdiń erekshe jeńildikter jasaýǵa daiyn ekenin atap ótti.
Ville Skinnari Eýropalyq odaq aiasyndaǵy yqpaldastyqtyń perspektivalary jaqsy ekenin jetkizip, klimattyń ózgerýine qarsy kúreste qabyldanyp jatqan sharalardy jáne ekologiialyq máselelerdi sheshý, aýyl sharýashylyǵy, azyq-túlik sektoryn damytý, tsifrlandyrý, kiberqaýipsizdik jónindegi josparlardy qoldaitynyn aitty. Fin tarapy atalǵan salalar boiynsha yqpaldastyq ornatýǵa daiyn.
Osy oraida saýda-ekonomikalyq yntymaqtastyq jónindegi úkimetaralyq komissiianyń jáne onyń energetika, kólik, aýyl sharýashylyǵy, bilim salalary boiynsha tórt jumys tobynyń qyzmetin jandandyrý mańyzdy ekeni atap ótildi.
Áńgimelesý barysynda óńirlik kún tártibindegi ózekti máseleler qozǵaldy. Atap aitqanda resmi kómek kórsetýdi damytý aiasyndaǵy kooperatsiianyń, sondai-aq, Ortalyq Aziianyń ekologiialyq máselelerin sheshýdiń jáne Aýǵanstandaǵy qaýipsizdik pen turaqtylyqty kúsheitýdiń áleýeti mol ekeni aityldy.
