Qasym-Jomart Toqaev Saýda jáne integratsiia ministri Baqyt Sultanovty qabyldady, dep habarlaidy Aqorda.
Memleket basshysyna jańadan qurylǵan ministrliktiń júrgizip jatqan jumystary, shtat quramynyń jasaqtalýy jáne tiisti normativtik-quqyqtyq baza daiyndaý jóninde málimet berildi.
Qazaqstan Prezidenti ministrge birqatar mindet júktedi.
«Ulttyq múddelerdi qorǵaý úshin ortalyq jáne jergilikti atqarýshy organdardy úilestirýge jáne Eýraziialyq ekonomikalyq odaq, QHR jáne Ortalyq Aziia naryqtaryndaǵy taýarlarymyzdy ilgeriletýge kúsh salý qajet. Eksportqa shyǵarýshylardy qoldaý úshin olarǵa kórsetiletin qyzmet túrlerin «bir tereze» qaǵidaty boiynsha jumyldyrý kerek. Ishki naryqty qorǵaý jáne ony sapaly ári qoljetimdi taýarlarmen toltyrý máseleleri halyqtyń áleýmettik-ekonomikalyq jaǵdaiymen jáne el ekonomikasynyń damýyna tikelei bailanysty. Sondyqtan, zamanaýi formattaǵy naryqty damytý jáne aqshasyz tólem mehanizmin keńeitý máseleleri boiynsha jergilikti atqarý organdarymen ózara is-qimyldar júrgizý mańyzdy», - dedi Qasym-Jomart Toqaev.
