Qazaqstan Prezidenti Qasym-Jomart Toqaev Mádeniet jáne sport ministri Aqtoty Raiymqulovany qabyldady, dep habarlaidy Aqorda.
Mádeniet jáne sport ministri buqaralyq sportty damytý jumystary qarqyndy júrip jatqanyn atap ótip, mádeniet qyzmetkerleriniń eńbek aqysyn kóbeitý maqsatynda qolǵa alynǵan bastamalar týraly aitty. Qazirdiń ózinde mádeniet qyzmetkerleriniń jalaqysy jergilikti jerlerde 35%, al respýblikalyq deńgeide 50% artqan. Budan bólek, ministrliktiń pandemiia kezinde ótkizgen onlain sharalary jóninde de málimet berdi.
Sonymen qatar Aqtoty Raiymqulova Prezidentke qazaqstandyq sportshylardyń aldaǵy Olimpiada oiyndaryna daiyndyǵy, jańadan ashylǵaly jatqan Týrizm jáne meimandostyq ýniversitetiniń jumysy jaiynda aitty.
Kezdesý sońynda Qasym-Jomart Toqaev biylǵy Joldaýda aitylǵan basym baǵyttardy tiisti deńgeide júzege asyrýǵa, el arasynda buqaralyq sportty keńinen nasihattap, ony odan ári damytýǵa qatysty naqty tapsyrmalar berdi. Sondai-aq latyn álipbiin engizý máselesinde asyǵystyq jasamai, jumysty ǵalymdarmen jan-jaqty saraptai otyryp júrgizý kerek ekenin atap ótti.
