Memleket basshysynyń Niý-Iorkke jasaǵan saparynyń alǵashqy kúnine qurylǵan resmi baǵdarlamasy amerikalyq iri kompaniialardyń basshylary qatysqan jiyn ótkizýimen túiindeldi, dep habarlaidy "Ult aqparat" Aqordaǵa silteme jasap.
Qasym-Jomart Toqaev óz sózinde Qazaqstan-Amerika biznes-qaýymdastyǵynyń ókilderin Qaýymdastyqtyń qurylǵanyna 20 jyl tolýymen quttyqtap, osy is-sharany uiymdastyrǵany úshin rizashylyǵyn bildirdi.
Prezident sóz basynda Elbasy Nursultan Nazarbaevtyń 2018 jyldyń qańtar aiyndaǵy AQSh-qa sapary aiasynda jasalǵan qazaqstandyq-amerikalyq keńeitilgen strategiialyq áriptestik týraly birlesken málimdemege qol qoiylǵanyna toqtalyp, sol kezden bastap eki el arasyndaǵy saýda-ekonomikalyq jáne investitsiialyq yntymaqtastyqtyń aitarlyqtai nyǵaia túskenin atap ótti.
Memleket basshysy AQSh Qazaqstan ekonomikasynyń iri investorlarynyń biri ekenin de aitty. Búginde bizdiń elimizge amerikalyq investorlar jalpy kólemi 45 milliard dollardan astam qarjy salǵan. Qazaqstanda 500-den asa amerikalyq kompaniia jumys isteidi.
– 2018 jyly Qazaqstanǵa tikelei tartylǵan amerikalyq investitsiialar kólemi 5,3 milliard dollarǵa jetip, jańa rekord ornatty. Al ózara saýda kólemi eki esege artyp, 2018 jyly 2,8 milliard dollardy qurady, – dedi Qasym-Jomart Toqaev.
Qazaqstannyń ekonomikalyq múmkindikteri týraly aitqan Prezident amerikalyq biznesmenderdiń nazaryn el damýyndaǵy úsh mańyzdy máselege aýdardy. Olar: qolaily investitsiialyq ahýal, naryq pen kommýnikatsiiany damytý jáne adami kapitaldy nyǵaitý.
Memleket basshysy amerikalyq seriktesterge Qazaqstan Úkimetiniń investitsiialyq ahýaldy jaqsartý maqsatynda zań ústemdigin, kelisim-sharttarǵa qol suǵylmaýyn jáne ziiatkerlik menshik quqyǵyn qorǵaýdy qamtamasyz etý baǵytyndaǵy jumystardy jalǵastyra beretinin jetkizdi. Onyń aitýynsha, investorlarmen jumys isteýdegi basty másele turaqtylyq pen ashyqtyqty saqtaý bolyp tabylady.
Áńgime barysynda Qazaqstannyń energetika, aýyl sharýashylyǵy, qarjy jáne adami kapital salalaryndaǵy áleýeti týraly da aityldy. Sonymen qatar, Qasym-Jomart Toqaev elimizdiń kólik-logistikalyq múmkindikterine de jeke toqtaldy.
– Qazaqstan Shyǵys pen Batysty jalǵaityn mańyzdy kólik haby bolyp esepteledi. Transkontinentaldyq baǵyttardyń 70 paiyzdan astamy Qazaqstan aýmaǵy arqyly ótedi, – dep atap ótti Qazaqstan Prezidenti.
Sóz sońynda Qasym-Jomart Toqaev Amerikanyń isker top ókilderine el Prezidenti retinde Qazaqstan men AQSh arasyndaǵy ekonomikalyq áriptestiktiń artýyna kúsh-jigerin jumsaitynyn aitty.
Osy kúni Memleket basshysy taǵy da birqatar iri halyqaralyq kompaniialardyń basshylarymen kezdesý ótkizdi.
Prezident «Royal Dutch Shell» kompaniiasynyń bas atqarýshy direktory Ben Van Bardenmen munai-gaz jobalaryn júzege asyrý jónindegi yntymaqtastyq jaiyn talqylady.
Memleket basshysy «JPMorgan Chase & Co.» transulttyq kompaniiasy Direktorlar keńesiniń tóraǵasy jáne bas atqarýshy direktory Djeimi Daimonmen qarjy institýttary arqyly ózara is-qimyl máselesin qarady.
«Tyson Fresh Meats» kompaniiasynyń prezidenti Stiv Staýffermen jáne «Valmont Industries» kompaniiasynyń bas atqarýshy direktory Stiv Kanevskimen kezdesýinde aýyl sharýashylyǵy salasyndaǵy investitsiialyq jobalardy iske asyrý máseleleri qozǵaldy.
«Plug' n Play» kompaniiasynyń bas atqarýshy direktory Said Amidimen, «500 Startups» startap-akseleratorynyń jáne venchýrlik qorynyń vitse-prezidenti, basqarýshy seriktesi Bedi Iangpen kezdesý kezinde startap-jobalar salasyndaǵy yntymaqtastyq perspektivalary sóz boldy.
Sondai-aq, Qazaqstan Prezidenti «Amazon Web Services» kompaniiasynyń jahandyq memlekettik saiasat jónindegi vitse-prezidenti Maikl Pýnkpen elektrondy saýda salasyndaǵy ózara is-qimyl jaǵdaiyn talqylady.
