Ishki ister ministri Qalmuhanbet Qasymov Ortalyq kommýnikatsiialar qyzmetinde ótken baspasóz máslihatynda jýrnalist qoiǵan «Qazaqstan politsiiasy nelikten Grýziia tájiribesin engizbeidi?» saýalǵa jaýap berdi, dep habarlaidy Baq.kz tilshisi.
Ol qazaqstanyq quqyq qorǵaý organdaryna Grýziia tájiribesin engizýge qarsylyq tanytpaitynyn aitty.
«Qylmystyq atqarý júiesi komiteti bizge berilgeli bes jyl ótip ketti. Tótenshe jaǵdailar komitetiniń bizge berilgenine úsh jyl boldy. Jumys shash etekten ekenin túsinip otyrmyn. Biraq, tapsyrmaǵa bailanysty jumystardyń barlyǵyn atqaryp otyrmyz. Grýziialyq ádis týraly aitsaq: biz oǵan qarsy emespiz. Sonda baryp, kózimizben kórdik. Bizde olardyń atqarǵan jumysy men bizdiń júmysymyz týraly keste bar. Bizdiń elimizge engizýge bolatynnyń bárin aldyq. Bir Grýziiaǵa ǵana emes, sondai-aq birneshe ret Germaniiaǵa bardyq. Ózim Germaniiada, Polshada, Estoniiada boldym. Bárin kórdik», - dep jaýap berdi ministr jýrnalist saýalyna.
Qasymov Grýziia tájiribesiniń bir bóligi qazaqstandyq politsiia qurylymdaryna engizilgenin atap ótti.
«Adamdar kóp suraqqa mán bermei «Nege grýziialyq tájiribeni engizbeisizder?» deidi. Eń birinshi olar ne istedi? Grýziianyń aýmaǵy Aqmola oblysymen birdei ǵana. Jeti aýdanda jeti aýdandyq bólimderdi saldy, ministrlikti saldy. Onyń bárine telekommýnikatsiiany tolyǵymen alyp keldi de, politsiiaǵa kiimdi berdi. Sanyn qysqartty. Ailyqtaryn 500-den 2 myń AQSh dollaryna deiin kóterdi. Ol jaqta – 3,6 mln adamǵa 82 myń politsei bolǵan. Sodan soń olardyń sanyn 20 myńǵa deiin qysqartyp, ailyqtaryn 10 esege deiin kóterdi. Bul máseleni bizge bólingen biýdjet aiasynda sheshemiz. Al dál qazir olai istei almaimyz. (...) Biz bir ǵimarat ta salǵan joqpyz. Bizdiń ailyqty kótermedi, tehnika da, jańa forma men ratsiialardy da bergen joq, biraq bul máselelerdi biz ózimizdiń biýdjetke qarap sheship jatyrmyz», - dedi Qalmuhanbet Qasymov.
