Qytaidaǵy qandastarymyz "qysym kórip jatyrmyz" dep arasha surap jatsa, Qazaqstan politsiiasy elge oralǵan azamattardy qaitadan Qytaiǵa jibermekshi. Tipti, tirkeýiniń ýaqytty ótti dep aiyptalǵan Sabyrǵali Sultansháriptiń jarty jyldai tósek tartyp jatqany da esh kedergi emes siiaqty. 2 jyl buryn kóship kelgen otbasynyń tirkelýine taǵy da sol "sottalmaǵan" degen anyqtama bóget bolǵan. 31 arna tilshileri jaǵdaidy bilý úshin Astanadan 300 shaqyrym jerdegi Kúnshalǵan aýylyna arnaiy baryp kelgen.
Sabyrǵali aǵanyń tósek tartyp sal adamdai kún keship jatqanyna 7 aidan asqan. Bul aýrýdy da tirkelemin dep júrip taýypty. Viza ýaqyty bitip jatqan soń kúnniń borandyǵyna qaramastan jolǵa shyqqan. Kóligi buzylǵan soń aýdan ortalyǵyna jaiaý jetip alaiyn dep ólermendik tanytyp, osyndai kúige túsipti. 1 jarym jyl boiy dedektetip júgirtken qujat – "sottalmady" degen anyqtama eken.
"Ózimizdiń jergilikti aýyl, aýdan, aimaq — osy 3 jerden ákeldik. Bizde Qytaida 1 japyraq qaǵazdy barlyq jerden izdemeidi ǵoi. Qystaqtyki bolsa da moiyndaidy. Zańnyń tańbaly qaǵazy bolsa bitti. Al myna jerde ákep jatsań kerek qylmaidy", — deidi Sabyrǵali Sultanshárip.
"Sottalmaǵan" degen anyqtamanyń jyrymen Sabyrǵali aǵa týra 1 jyl buryn aryzdanǵan bolatyn. Sol kezde kóshi-qon komitetiniń ózi "meili aýyldyq bolsyn, kez kelgen anyqtama jaramdy" dep málimdegen edi.
Alaida, ár oblystyń óz zańy bar siiaqty.
"Maǵan oblystyń bergen nusqaýy sondai. Shyńjań, Úrimshi. Mende ol úsh jerden ǵana qabyldaý kerek dep jazylǵan", — deidi Aqmola oblysy Ereimentaý aýdany IIB kóshi-qon qyzmetiniń aǵa inspektory Zulpyqar Jumadilov.
Sultansháriptiń otbasy áreń degende Úrimshiden de anyqtama aldyrtypty. Alaida, onysy da jaramsyz bolyp qalǵan. Prezidenttiń tapsyrmasymen talap ózgerip, endi "sottalmady" degen qaǵaz kerek bolmai shyǵypty. Alaida, Sabyrǵali aǵa men jubaiyna bul jeńildik kómektespeidi. Óitkeni, ekeýine tirkelý erejesin buzǵany úshin sottyń sheshimimen Qytaiǵa baryp, 1 jyldan keiin qaita oralý mindettelgen.
Oblystyq ishki ister departamentiniń ókilderi de "olar zańdy buzdy, sot sheshimin oryndaýy kerek" dep otyr. Ministrlik ókilderi "sottyń sheshimin appeliatsiia arqyly qaita qaratýǵa bolady" deidi. Aiyptarynan aqtalsa ǵana basqa jolmen sheshýge múmkindik týmaq.
Al, sai-súiegi syrqyraǵan kúieýin Qytaiǵa qalai aparatynyn oilaǵan Tarahan apanyń jylaǵannan basqa amaly joq.
"Armanymyz sol — shal jazylsa, sodan keiin azamattyq alsaq dep otyrmyz ǵoi. Basqa ne arman bolady? Qolymyzda qujat bolmaǵan soń durys doǵdyrǵa da kórsete alǵamyz joq", — deidi oralman Tarahan Saǵatbekqyzy.
Túitkildiń túinegin sheshý — ishki ister ministrliginiń ózine tirelgendei. Zańgerler, zańdy basqa qyrynan qarasa ońtaily sheshimin tabýǵa bolady dep otyr.
