Qazaqstan pasporty 2020 jylǵy Henley Passport Index nemese saiahat úshin yńǵaily tólqujattar reitinginde 199 eldiń arasynda 67-orynǵa ornalasty. Bul týraly Henley & Partners konsaltingtik kompaniiasy seisenbi kúni jariialaǵan málimette aitylǵan, dep habarlaidy "Ult aqparat".
Henley Passport Index reitingi Halyqaralyq áýe kóligi qaýymdastyǵynyń (IATA) ekskliýzivti málimetterine negizdelgen jáne 199 eldiń tólqujaty men 227 týristik baǵytty qamtidy. Jáne kez kelgen elde vizalyq saiasattyń ózgertilýine bailanysty jyl boiy jańartylyp otyrady.
2020 jylǵy Henley Passport Index reitinginde vizasyz qatynaýǵa bolatyn ár memleket úshin 1 baldan berilgen. Qazaqstan tólqujaty álem elderi men aimaqtarǵa vizasyz barý boiynsha 76 ball jinap, 67-orynǵa turaqtady. Iaǵni, elimiz azamattary 76 elge vizasyz qatynai alady.
Kósh basynda – Japoniia. Kúnshyǵys eli tólqujatynda 191 upai bar, ol úshinshi jyl qatarynan birinshi oryn alyp otyr. Singapýr pasporty 190 upaimen – ekinshi orynda, al Ońtústik Koreia men Germaniia 189 upaimen – úshinshi pozitsiiada.
Resei tólqujaty 118 upaimen 51-satyǵa ornalassa, 71 elge vizasyz kirý (nemese kelý boiynsha viza) múmkindigin jasaǵan Qytai barlyq elder arasynda 72-shi orynda tur.
Budan bólek, Belarýs 68-inshi, Ázerbaijan - 76, Qyrǵyzstan - 80, Armeniia - 81, Tájikstan - 84, Ózbekstan - 85 jáne Túrikmenstan 90-orynda.
Al tizim sońyna Aýǵanstan pasporty ornalastyrylǵan. Aýǵan tólqujatynyń ieleri álemniń 26 baǵytyna ǵana vizasyz kire alady.
Irak pen Siriianyń tólqujattary sońynan sanaǵanda ekinshi jáne úshinshi oryndarda.
