Búgin Parlament palatalarynyń birlesken otyrysy ótip, altynshy sailanǵan Parlament tórtinshi sessiiasyn aiaqtady, dep habarlaidy QazAqparat tilshisi.
«Búgin biz altynshy sailanǵan QR Parlamentiniń tórtinshi sessiiasyn aiaqtap otyrmyz. Bul dástúr boiynsha atqarylǵan jumystarǵa esep berip, aldaǵy maqsattarǵa nazar aýdaratyn mańyzdy kezeń. Árine, qai qoǵamda bolsa da, qai ýaqytta bolsa da zańnyń orny árqashan da erekshe. Sebebi, zań bar jerde ádildik, bostandyq jáne tynyshtyq bar. Osy jolda Parlament elimiz úshin, halqymyz úshin kóptegen qajetti zańdardy qabyldady. Onda Elbasy Nursultan Ábishuly Nazarbaevtyń tórtinshi sessiianyń ashylýynda bergen tapsyrmalary men Qazaqstan halqyna Joldaýy basshylyqqa alyndy», - dep toqtaldy QR Parlamenti Májilisiniń tóraǵasy Nurlan Nyǵmatýlin.
Osy oraida ol ótken sessiia mańyzdy tarihi oqiǵalarǵa toly bolǵanyn atap ótti. Birlesken otyrys barysynda N. Nyǵmatýlin dástúr boiynsha atqarylǵan jumystarǵa esep berdi.
«Sessiia barysynda qos palatanyń 5 birlesken otyrysy, Májilistiń 41 jáne Senattyń 26 jalpy otyrysy ótti. Onda 319 mańyzdy másele qaraldy. Jalpy, tórtinshi sessiia bastalǵan kezden 83 zań jobasy qabyldandy. Onyń ishinde 82 qujatqa Memleket basshysy qol qoiyp, olar óz kúshine endi», - dedi Májilis tóraǵasy.
Ótken sessiiada Parlamentte 20 Úkimet saǵaty, úsh parlamenttik tyńdaý, 24 «dóńgelek ústel» otyrysy, komitetterdiń 29 kóshpeli otyrysy, sondai-aq tórt halyqaralyq konferentsiia uiymdastyryldy. Olar óte mańyzdy elimizdiń ekonomikalyq jáne áleýmettik máselelerine arnaldy.
«Parlament jumysynda depýtattyq saýaldardyń róli de óte zor. Ol eń aldymen árbir azamattyń, halqymyzdyń nazarynda júrgen suraqtardy sheshýge baǵyttalady. Osyǵan bailanysty Parlamenttiń qos palatasynyń depýtattary ótken sessiiada 319 depýtattyq saýal joldady. Sonyń ishinde Májilis depýtattary 211, Senat depýtattary 108 saýal joldady», - dedi Nurlan Nyǵmatýlin.
Eske sala keteiik, Parlamenttiń tórtinshi sessiiasy 2019 jylǵy 5 shildege deiin uzartyldy.
Atap aitqanda, mańyzdy sharalardy iske asyrý úshin 2019-2021 jyldarǵa arnalǵan respýblikalyq biýdjet týraly zańǵa ózgeristerdi engizý qajet boldy. Osyǵan bailanysty biýdjetke engiziletin ózgeristerdi qarastyrý úshin Parlament sessiiasynyń jumys merzimi uzartyldy.
Osy aptada Qazaqstan Parlamenti «2019-2021 jyldarǵa arnalǵan respýblikalyq biýdjet týraly» QR Zańyna ózgerister men tolyqtyrýar engizý týraly» Zańyn qabyldady.
