Halyqaralyq sarapshylardyń pikirinshe Qazaqstan pandemiia kezinde úzdiksiz bilim berý úrdisin tiimdi uiymdastyra aldy. Bul týraly Bilim ministrliginiń baspasóz qyzmeti habarlady.
«COVID-19 indeti bastalyp, qashyqtan oqytý formatyna amalsyz kóshken kezde Qazaqstan úzdiksiz bilim berý úrdisin tiimdi uiymdastyra aldy. Endi pandemiiadan keiingi kezeńde bilim berý protsesin qalpyna keltirý jáne syn-qaterlerge jaýap bere alatyn mektep júiesin qurý úshin jaǵdai jasaý qajet «, – dedi «Bilim berýdegi olqylyqtardy qalpyna keltirý jáne turaqty mektep júiesin qurý» atty onlain-vebinar barysynda Dúniejúzilik banktiń Qazaqstandaǵy turaqty ókili Jan-Fransýa Marto.
Atalǵan sharany Dúniejúzilik bank, BUU Balalar Qory (IýNISEF), IýNESKO, Dúniejúzilik densaýlyq saqtaý uiymy men Bilim jáne ǵylym ministrligi birlesip uiymdastyrdy.
Halyqaralyq sarapshylar pandemiia kezinde mektepterdiń jabylýy álem boiynsha oqýshylardyń úlgerimine jáne mektep baǵdarlamasyn meńgerý deńgeiine áser etkenin aitty. «Bilim berýdegi týyndaǵan máselelerdi qalpyna keltirý úshin tiimdi sharalar qabyldaý qajet», – deidi sarapshylar.
Bilim jáne ǵylym vitse-ministri Sholpan Karinova karantin kezeńinde qashyqtan oqytý formatyna kóshý barysynda tek syn-qaterler ǵana emes, jańa múmkindikter de paida bolǵanyn aitty.
«Osy kezeńde balalardy oqytýǵa múddeli taraptardyń bári ózara jaqyndai tústi. Ata-analar oqý protsesine belsendi aralasyp, jaǵdaidy nazarda ustap otyr. Odan bólek bilim berý internet-platformalarynyń jumysy jańǵyrǵanyn, tsifrly saýattylyqtyń artqanyn, kompiýterizatsiia men keri bailanystyń kúsheigenin aita ketken jón», –dedi vitse-ministr Sholpan Karinova.
Vitse-ministrdiń aitýynsha, qashyqtan bilim berý dástúrli bilim berýdi almastyra almaidy. Óitkeni oqý protsesin uiymdastyrý – bul jai ǵana oqý úrdisi ǵana emes, sondai-aq balalardyń ortaǵa beiimdelýi men ózara qarym-qatynas jasaýyna, olardy damytýǵa baǵyttalǵan jumys.
Pandemiia jáne karantindik shekteýler kezinde oqý protsesin retteý úshin birqatar normativtik quqyqtyq qujat qabyldandy, baǵalaý júiesi beiimdelip, bilim berýdiń memlekettik standarty men sanitarlyq erejelerge ózgerister engizildi.
«Biz bul baǵytta sarapshylarmen belsendi jumys jasap, qoldanystaǵy jumys tájiribesine taldaý jasap jatyrmyz. Bul bir kúndik jumys emes, qalpyna keltirý protsesi uzaq úrdis ekenin túsinemiz. Qazirgi tańda mektepterdiń 50%-y, tek 1 million oqýshy dástúrli formatta bilim alyp jatyr. Biz úshin barlyq bilim berý uiymynyń ashylǵany mańyzdy. Ol úshin epidemiologiialyq jaǵdaidyń jaqsaryp, sanitar dárigerlerdiń ruqsat berýin kútemiz», – dedi Sholpan Karinova.
Halyqaralyq sarapshylar pandemiia kezindegi Bilim jáne ǵylym ministrliginiń qyzmetine oń baǵa berdi.
«Qiyn-qystaý kezeńde tek problemalarǵa ǵana basa nazar aýdarmai, sonymen qatar osy jaǵdaida ashylǵan jańa múmkindikterge de mán berip otyrǵandaryńyzdy quptaimyn. Qazaqstannyń bilim salasynda jaqsy nátijelerge jetkenin atap ótkim keledi. Bul kezeńde ministrlik ata-analarmen, muǵalimdermen jáne oqýshylarmen ashyq dialog júrgizdi, bul óte mańyzdy ári qýanarlyq jaǵdai» , – dedi bilim salasyndaǵy jetekshi sarapshy, Dúniejúzilik banktiń ókili Aisha Vaýda.
IýNISEF-tiń Qazaqstandaǵy ókili Artýr Van Diren muǵalimderdiń pandemiia kezindegi jumysyn erekshe atap ótip, alǵysyn bildirdi.
«Qazirgi tańda kórinbeitin erlik is jasap jatqan batyrlarymyz – muǵalimder. Qashyqtan oqytý formatyna tez kóshý – ońai sharýa emes. Osy rette muǵalimder qyrýar jumys atqarǵanyn atap ótken jón» , – dedi Qazaqstandaǵy BUU Balalar qorynyń ókili.
