QR Eńbek jáne halyqty áleýmettik qorǵaý ministri Serik Shápkenov 109-shy Halyqaralyq eńbek konferentsiiasynyń plenarlyq otyrysynda beineúndeý jasady, dep habarlaidy "Ult aqparat".
«Qazaqstan Halyqaralyq eńbek uiymynyń (budan ári – HEU) ǵasyr deklaratsiiasynyń eńbek salasynyń bolashaǵy týraly beiildiligin rastaidy jáne Bas direktordyń «Covid kezindegi eńbek» atty baiandamasyn quptaidy. Ol jumys oryndaryn, halyqtyń tabysyn saqtaý jáne ekonomikalyq ósýdi jandandyrý úshin tiisti jahandyq den qoiý sharalaryn qabyldaý maqsatynda ýaqtyly, ózekti ári qajet bolyp tabylady.
Pandemiia kezeńinde Qazaqstan Úkimeti jumyspen qamtýǵa járdemdesýge, kásipkerlikti jandandyrýǵa, tsifrlandyrýǵa jáne agroónerkásiptik keshendi damytýǵa baǵyttalǵan daǵdarysqa qarsy sharalardy qabyldady.
2020 jyly atalǵan sharalarǵa 15 mlrd AQSh dollarynan astam qarajat bólindi.
Pandemiia kezeńinde 1 mlrd AQSh dollarynan astam somaǵa 4 mln 600 myń azamat tabysynan aiyrylý boiynsha áleýmettik tólemder aldy, sondai-aq birjolǵy áleýmettik tólemder aýrý juqtyrǵan meditsina qyzmetkerlerine jáne qaitys bolǵan meditsina qyzmetkerleriniń otbasylaryna jalpy somasy 50 mln AQSh dollaryna júrgizildi.
Halyqtyń áleýmettik osal toptarynan 1 mln-nan astam azamat 60 mln AQSh dollary somasyna azyq-túlik-turmystyq jiyntyqtar aldy.
Elektrondyq úkimet portaly arqyly ataýly áleýmettik kómekke ótinish berý tetigi iske asyryldy.
936 myń adamǵa ataýly áleýmettik kómek kórsetildi, 218 myń balaǵa jalpy somasy 214 mln AQSh dollaryna kepildik berilgen áleýmettik toptama usynyldy.
Ótken jyly «Jumyspen qamtýdyń jol kartasy» daǵdarysqa qarsy baǵdarlamasy iske qosyldy, onyń aiasynda 239 myń jumys orny quryldy. Ony júzege asyrýǵa 2 mlrd 400 mln AQSh dollary bólindi.
Qabyldanǵan sharalardyń nátijesinde jumyssyzdyq deńgeii 4,9% qurady, onyń ishinde áielder arasynda – 5,3%, jastar arasynda – 3,8%.
Jumyspen qamtý sharalarymen biyl 1 mln 200 myń adam qamtylatyn bolady.
Aǵymdaǵy jyldan bastap Jumyspen qamtýdyń memlekettik baǵdarlamasyn ulttyq jobaǵa qaita formattaý josparlanýda, oǵan bes baǵyt – kásibi jáne aýmaqtyq utqyrlyq, ónimdi jumys oryndary, aýyldaǵy biznes jáne jumyspen qamtýdy tsifrlandyrý kiredi.
Qazaqstanda Múgedektigi bar adamdardyń quqyqtaryn, onyń ishinde laiyqty eńbek etý quqyǵyn qamtamasyz etý jónindegi 2025 jylǵa deiingi ulttyq jospar iske asyrylýda.
Ótken jyly «Múgedektigi bar adamdarǵa usynylatyn kásipter men sabaqtardyń atlasy» ázirlendi jáne múgedektigi bar adamdarǵa ońaltýdyń tehnikalyq quraldary men qyzmetterin óz betinshe tańdaýǵa múmkindik beretin Áleýmettik qyzmetter portaly engizildi.
2020 jylǵy mamyrda Eńbek zańnamasyna qyzmetkerlerdiń eńbek quqyqtaryn qorǵaýdy qamtamasyz etý úshin kásipodaqtardyń rólin arttyrýǵa qatysty ózgerister engizildi.
Biyl Úkimet, kásipodaqtar men jumys berýshilerdiń respýblikalyq birlestikteri arasyndaǵy 2021-2023 jyldarǵa arnalǵan jańa Bas kelisimde taraptardyń bir-biriniń qyzmetine zańsyz aralasýǵa jol bermeý jónindegi mindetteme bekitilgen.
Áielderdiń eńbegi shekteletin jumystar tizimin joiý jáne qashyqtyqtan jumys isteýdi quqyqtyq retteýdi jetildirý máseleleri pysyqtalýda.
Qazirgi ýaqytta «Tolyq emes jumys ýaqyty jaǵdaiyndaǵy jumys týraly» HEU № 175 Konventsiiasyna qosylý boiynsha jumys júrgizilýde.
Sońynda Qazaqstan Úkimeti HEU standarttaryna sáikes áleýmettik-eńbek saiasatyn jetildirý, áleýmettik ádilettilik pen laiyqty eńbekti qamtamasyz etý jónindegi jumysty jalǵastyratynyn atap ótkim keledi», – dedi Serik Shápkenov beine habarlamada.
Esterińizge sala keteiik, Halyqaralyq eńbek konferentsiiasy HEU-nyń sheshim qabyldaýdyń joǵary organy bolyp tabylady. Ol jyl saiyn HEU-ǵa múshe 187 memleketten úshjaqty delegatsiialardyń basyn qosý jolymen ótkiziledi.
