Ózbek taýarlaryna qatysty saýda sharalaryn qoldaný ózbek tarapymen kelissózder protsesine teris áser etýi múmkin.
Bul jaiynda QR Premer-Ministri Asqar Maminniń Senat depýtattarynyń resmi saýalyna bergen jaýabynda aitylǵan, dep habarlaidy "Ult aqparat".
Aita keteiik, Senat depýtattary Ózbekstan Respýblikasynan kilemder men kilem buiymdary importyna aktsizdik alym engizý nemese ÓR-den ákelý kezinde qazaqstandyq kilemder men kilem buiymdary úshin aktsizdik salyqty tómendetý boiynsha «qarsy» sharalardy qabyldaýǵa qatysty Úkimet basshysyna saýal joldaǵan bolatyn.
«Kedendik statistikanyń resmi derekterine sáikes ózbek kilemderiniń importy (SEQ TN kodtary 5701-5705) 2019 jylǵy qańtar-qarashada 3,9 mln. AQSh dollaryn qurady. Bul Qazaqstanǵa osy taýardyń jalpy importynyń 9,2%, iaǵni bul Qazaqstan zańnamasyna sáikes otandyq ónimdi qorǵaý úshin ózbek importyna aktsizdik alym engizý sharasyn qoldaný úshin jetkiliksiz. QR men ÓR arasyndaǵy saýda-ekonomikalyq qatynastar aitarlyqtai jaqsy, sondai-aq ózbek tarapynyń aktsizderdi alý jónindegi kelissózder protsesindegi oń serpindi eskere otyryp, ózbek taýarlaryna qatysty saýda sharalaryn qoldaný ózbek tarapymen kelissózder protsesine keri áser etýi múmkin. Sonymen qatar, otandyq óndirýshilerdiń múddelerin qorǵaý maqsatynda Qazaqstan Úkimeti aktsizderdi, onyń ishinde kilem buiymdarynyń aktsizin joiý máselesi boiynsha kelissózderdi jalǵastyrady», - dep atap ótedi Premer-Ministr depýtattardyń saýalyna orai.
Onyń aitýynsha, 2011 jylǵy 18 qazandaǵy TMD erkin saýda aimaǵy týraly shartqa qosylý aiasynda qabyldanǵan ÓR mindettemelerine sáikes, 2021 jylǵy 1 qańtardan bastap nemese Dúniejúzilik saýda uiymyna qosylǵan kúnnen bastap, osy kúnderdiń qaisysy buryn bastalǵanyna bailanysty, ÓR importtyq jáne óndiriletin jergilikti ónimge aktsiz mólsherlemelerin teńestiredi.
«Qazirgi ýaqytta ÓR kilemderge aktsiz salyǵyn qoldanbaitynyn eskere otyryp, ótpeli kezeńniń qorytyndylary boiynsha uqsas ónimniń importyna aktsizdiń kúshin joiýdy kútýge bolady. Bul rette, ózbek tarapynyń importtyq ónimge aktsizdi qoldaný praktikasyn toqtatý máselesi uzaq ýaqyt boiy ártúrli alańdarda, onyń ishinde eń joǵary deńgeide kóterilýde. Sońǵy jyldary ÓR aktsizdik saiasaty aitarlyqtai yryqtandyrylǵanyn atap ótý kerek», - dedi Asqar Mamin.
Premer-Ministrdiń dereginshe, ÓR búgingi kúni syrtqy ekonomikalyq qyzmettiń taýarlar nomenklatýrasynyń 10 belgisiniń 1071 taýar pozitsiiasyna qatysty aktsizderdi qoldanady. Onyń ishinde 508 taýar pozitsiiasy aýyl sharýashylyǵy, 563-i ónerkásip ónimderine jatady.
«2019 jyldyń 11 aiynyń qorytyndysy boiynsha aktsiz salýǵa jatatyn qazaqstandyq ónimniń 104 ataýy ÓR-ge eksporttaldy. Bul rette atalǵan taýarlar eksportynyń kólemi 73,1 mln AQSh dollaryn qurady. Qazaqstan Respýblikasynyń ulttyq zańnamasynda naqty elden jetkizilimder belgili bir taýar importynyń jalpy kóleminiń 30 paiyzdan astamyn alatyn import serpini oń bolǵan jaǵdaida, shyqqan eli boiynsha aktsizderdi qoldaný quqyǵy kózdelgenin atap ótken jón. Bul rette mundai aktsizderdi tek DSU-ǵa múshe emes elderge qatysty belgileýge bolady. Ózbekstan osy elderge jatady», - dedi Úkimet basshysy.
