Múgedektigi bar adamdardy áleýmettik qoldaý jáne jumysqa ornalastyrý úshin óńirlerde «TenQogam» ortalyqtary ashylady, dep habarlaidy QazAqparat.
Bul týraly halyqqa esep berý kezdesýinde QR Eńbek jáne halyqty áleýmettik qorǵaý ministri Serik Shápkenov aityp berdi.
«2020 jyly múgedektigi bar adamdarǵa arnalǵan Kásipter atlasy jasaldy jáne olardy jumysqa ornalastyrý kezinde, onyń ishinde enbek.kz portalynda jumys izdeýdi jaqsartý úshin paidalanýǵa bolady. Múgedektigi bar adamdardy áleýmettik qoldaý jáne jumysqa ornalastyrý úshin barlyq óńirde «TenQogam» ortalyqtaryn ashý josparlanǵan. Nur-Sultan men Almatyda mundai ortalyqtar psihologiialyq jáne quqyqtyq kómek, jumysqa ornalasýǵa járdem kórsete otyryp, tabysty jumys isteýde», - dep atap ótti ministr.
Ministrdiń aitýynsha, qazirgi ýaqytta áleýmettik qyzmet kórsetý sapasyn arttyrý maqsatynda Áleýmettik qyzmetti odan ári jańǵyrtý jónindegi ulttyq jospar ázirlendi jáne jaqyn arada qabyldanady.
«Osy sharalardyń nátijesinde múmkindigi shekteýli 695 myńnan astam adamnyń jáne ómirlik qiyn jaǵdaida qalǵan adamdardyń ómir súrý sapasy men qyzmetterdiń qoljetimdigi jaqsarady», - dep túiindedi Serik Shápkenov.
Aita keteiik, 1 shildeden bastap múgedektikti syrttai belgileý jobasy 6 óńirde iske qosyla bastaidy.
