Oqýshylarynyń matematika-jaratylystaný baǵytyndaǵy ǵylymi saýatynyń deńgeii boiynsha Qazaqstan álemniń úzdik 10 eliniń qataryna kirdi. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Postkeńestik elderde kadr daiyndaý júiesi eńbek naryǵynyń talaptaryna sai emes, memlekettik retteý tym artyq, al oqytý negizinen akademiialyq sipatqa ie» degen pikir bar. Shynymen de, bul syn ádil. Atalǵan problemany sheshý úshin Qazaqstan táýelsizdik jyldarynda kóptegen ádisterdi oi eleginen ótkizip shyqty. Búgingi kúni bizdegi bilim berý júiesi biliktiligi joǵary adami kapitaldy daiyndaýǵa toǵystyrylǵan», - dedi ministr QR Prezidenti Qasym-Jomart Toqaevtyń tóraǵalyǵymen ótip jatqan Sheteldik investorlar keńesiniń otyrysynda.
Osy oraida Ashat Aimaǵambetov oǵan Elbasy Nursultan Nazarbaevtyń bastamasymen qolǵa alynǵan «Bolashaq» baǵdarlamasy jarqyn dálel bola alatynyn aitty. Ol búginde shamamen 11 myń stipendiat sheteldegi oqýyn bitirip, Qazaqstan igiligi úshin jumys istep jatqanyn atap ótti.
«10 jyldyń ishinde Qazaqstan adami damý indeksi boiynsha ósim kórsetip, adami kapitaly óte joǵary deńgeidegi elderdiń qataryna kirdi. Bizde halyqtyń 100 paiyzǵa jýyǵy saýatty. Balalardyń 95 paiyzy mektepke deiingi tárbiemen jáne oqýmen, al 100 paiyzy mektepte oqýmen qamtylǵan. Oqýshylarymyz da básekege qabiletin kórsetip júr. Matematika-jaratylystaný ǵylymi saýaty zertteýinde balalarymyz progress kórsetti. Sońǵy ólshemge sáikes elimiz álemniń 40 eliniń ishinde úzdik 10 eldiń qataryna kirdi», - dedi A.Aimaǵambetov.
