Qazaqstan oqýshylarynyń olimpiada quramasy geografiia páninen ótken Eýropa olimpiadasynda kúmis jáne qola medal jeńip aldy. Bilim saiysy 18-21 maýsym aralyǵynda Serbiiada onlain formatta ótken, dep habarlaidy "Ult aqparat".
Ziiatkerlik baiqaýǵa 13 elden 152 oqýshy qatysqan. Aqtóbe men Shymkentte respýblikalyq olimpiadada top jarǵan úsh oqýshy Qazaqstan atynan baiqaýǵa qatysty. Olardy halyqaralyq saiysqa geografiia ǵylymynyń doktory, Ál-Farabi atyndaǵy QazUÝ professory G.Núsipova daiyndaǵan.
Jazbasha, mýltimediia testiler men praktikalyq týrdyń qorytyndysy boiynsha Qazaqstan quramasynyń qorjynyna eki medal tústi. Rýstam Valeev «kúmis» alsa, Erkebulan Tazabek «qolaǵa» qol jetkizdi. Al quramanyń taǵy bir múshesi Beihan Muqanovqa baiqaý sertifikaty berildi.
«Bul olimpiada oqýshylardyń geografiialyq jáne ekologiialyq zertteýlerge qyzyǵýshylyǵyn arttyrady. Ziiatkerlik jarys jas geograftar úshin biylǵy birinshi iri synaq ári tamyz aiynda ótetin halyqaralyq olimpiadaǵa qatysatyn baspaldaq boldy. Jýyqta ǵana shákirtterimiz informatika páninen ótken olimpiadada tórt qola medal jeńip aldy», - deidi Mektepke deiingi jáne orta bilim komitetiniń tóraiymy Maira Meldebekova.
Aita keteiik, bul ziiatkerlik saiysqa Qazaqstan oqýshylary osymen úshinshi jyl qatysyp otyr. Byltyr da oqýshylarymyz bir kúmis jáne bir qola jeńip alǵan bolatyn.
